Бош прокуратура атроф-муҳитни муҳофаза қилиш ва иқлим ўзгариши вазири Азиз Абдуҳакимовнинг “Яшил макон” лойиҳаси доирасида 2 миллиондан ортиқ экилмаган кўчатларни ҳисоботга “экилди” деб қўшиб ёзилгани тўғрисидаги гапларига муносабат билдирди.
Азиз Абдуҳакимовнинг 4 июль куни Олий Мажлис Қонунчилик палатаси ялпи мажлисида “Яшил макон” лойиҳасини амалга оширилиши мониторингида аниқланган камчиликлар юзасидан маъруза қилганди. Вазир “Яшил макон” лойиҳаси доирасида 2 миллиондан ортиқ экилмаган кўчатларни ҳисоботга “экилди” деб қўшиб ёзилгани, суғориб бўлмайдиган жойларга 7,3 миллион туп ниҳол ўтқазилгани, экилган 1,8 миллион туп кўчатни сақлаш ва парваришлаш учун тегишли масъуллар белгиланмагани ҳақида гапирган.
Қайд этилишича, мазкур ялпи мажлисда Бош прокуратуранинг Экология, атроф-муҳитни муҳофаза қилиш ва ўрмон хўжалиги соҳасидаги қонунчилик ижроси устидан назорат бошқармаси бошлиғи Ўктам Ўтаев иштирок этган. Маърузада келтирилган камчиликлар Бош прокуратура томонидан алоҳида назоратга олинган.
“Ҳозирда Бош прокуратура ва вазирлик мутахассисларидан иборат тузилган ишчи гуруҳ ҳолатга қонуний баҳо бериш ва айбдор шахсларга нисбатан тегишли чора кўриш юзасидан ўрганиш ишларини бошлади”, — дейилади хабарда.
Маълумот учун, бугунги кунда Ўзбекистондаги яшил майдонлар 6 миллион 673 минг гектарни ташкил этади. “Яшил макон” умуммиллий лойиҳаси доирасида ҳар йили камида 200 миллион туп дарахт экиш белгилангани назарда тутилган. Ўтган 2021 йилда республикада 85 миллион туп, 2022 йилда жами 202,7 миллион туп дарахт кўчатлари экилган. Жорий йилнинг баҳорги мавсумида ҳудудларга 127,7 миллион туп дарахт ўтқазилган.
Изоҳ (0)