Сурхондарёдаги боғчада қизалоқ каравотдан йиқилиб, шифохонага олиб кетилди

Сурхондарё вилояти Шеробод туманидаги боғчаларнинг бирида қизалоқ каравотдан йиқилиб, шифохонага олиб кетилди. 

Ижтимоий тармоқларда боғчада болани уриб, жағ ва лаб қисмини йиртиб юборишгани ҳақида хабарлар тарқалган. Тарбиячининг сўзларига кўра, қизалоқ калтакланмаган, каравотдан ўз эҳтиётсизлиги оқибатида йиқилиб тушган. 

“Каравотдан йиқилиб кетди. Тармоқларда тарқалган нарса ёлғон. Тепадан иложи борича ўзимиз туширишга ҳаракат қиляпмиз”, — дейди тарбиячи. 

Шунингдек, қизнинг бувиси ҳам боғчага эътирози йўқлигини, набираси ўзи йиқилиб тушганини айтди. Вилоят Мактабгача ва мактаб таълими бошқармаси ҳам қизалоқ беҳосдан йиқилганини билдирган. Унинг йиқилиши оқибатида ияк ва лаб қисми жароҳатланган. Тарбиячи томонидан биринчи ёрдам кўрсатилган. 

Ўрганиш давомида маълум бўлишича, қизалоқнинг аҳволи ҳозирда яхши. Ота-онасининг ҳам эътирози йўқ. Туман Мактабгача ва мактаб таълими бўлими томонидан 3-сонли оилавий МТТга огоҳлантириш хати юборилди.