Бир пайтлар Ғарб шоу-бизнеси Жей Лосиз мавжуд бўлганини бугунги кунда тасаввур қилиш жуда қийин, аммо бундай оламшумул машҳурлик учун курашиш керак эди. У тинимсиз меҳнати билан бу эътирофга сазовор бўлди.
Бўлажак юлдузнинг болалик даври
Женнифер Лопез Нью-Йоркда камтарона пуэрто-риколиклар оиласида туғилган. Бўлажак юлдуз шаҳарнинг марказий қисмида эмас, балки энг жиноий ҳудудлардан бири — Бронксда ўсган. Лопеснинг ота-онаси шоу-бизнесдан узоқда бўлиб, отаси дастурчи бўлиб ишлаган, онаси эса болаларни тарбиялаш ва уй ишлари билан шуғулланган. Женнифер беш ёшидан бошлаб вокал ва рақс сабоқларини олишни бошлайди.
“Болалигимданоқ қўшиқ айтиш, рақсга тушиш ва рол ўйнаш билан бирданига шуғулланишни хоҳлардим. Менга мусиқа олами кўпроқ ёқарди”, — дейди Лопес ўзи ҳақидаги ҳужжатли фильмда.
Юлдузнинг севимли машғулотлари рўйхати шу билан тугамайди — Жей Ло икки синглиси билан католик мактабида ўқиган, у ерда ҳам югуриш, гимнастика ва софтбол билан шуғулланган. Спорт унга нафақат идеал қоматга эришишга, балки чидамлиликни оширишга ёрдам берди. Бироқ энг қийин даврларда у учун машғулот эмас, балки хорда қўшиқ айтгани ва театр спектаклларида қатнашгани фойда беради. Қизнинг саъй-ҳаракатлари юқори баҳоланди — 16 ёшида у “Менинг жажжи қизим” фильмида суратга тушиб, кинода дебют қилади.
Гарчи дастлаб ота-онаси қизининг севимли машғулотини қўллаб-қувватлаган бўлса ҳам, унинг жиддийроқ касб танлашини хоҳлашади. Шундай қилиб, Женнифер ҳуқуқ факультетига ўқишга киради ва адвокат ёрдамчиси бўлиб ишлай бошлайди. Бироқ кўп ўтмай, ҳуқуқшунослик олами унга бегона эканлигини англайди ва ўқишни ташлаб кетади. Ота-онаси билан можародан сўнг, мустақил ҳаёт бошлашга киришади. Ижара пули учун тунги клубларда рақсга тушиши ва шубҳали лойиҳаларда иштирок этишига тўғри келади. Умуман пули бўлмаган пайтларда эса Лопес машғулот хонасида тунаб қолади.
Актриса
Женнифер қийинчиликлардан қўрқмасди ва унинг қатъиятига фақат ҳавас қилиш мумкин. У бутун кунни рақс студиясида ўтказади, бу, албатта, ўз самарасини беради. Ўша пайтда юлдуз “Оклахома” каби мусиқий фильмларда ўйнай бошлайди. Танила бошлаган Лопес Бродвейнинг Golden Musicals of Broadway хорига таклиф қилинади.
Шундан сўнг Жей Ло ҳаётида янги босқич бошланади: 1991 йилда у “Ёрқин ранглар” сериалида иштирок этади ва шундан сўнг у сериалларда рол ўйнай бошлайди. Гарчи ўша пайтда Лопесга юқори даражадаги лойиҳалар таклиф қилинмаган бўлса-да, у актрисалик карьерасини орзу қилар, орзуси сари ишонч билан ҳаракат қиларди.
Женнифер “Нигоҳдан ташқарида” фильмидаги иштироки учун 2 миллион доллар гонорар олган. Бундан олдин лотин америкалик биронта ҳам актриса бундай даромад билан мақтана олмасди.
“Мен бу соҳадан узоқда ўсганман. Бутун умримни мени эшитишлари, кўришлари ва жиддий қабул қилишлари учун курашиб ўтказдим”, — дейди у.
Айтганча, Женнифер ўзини нафақат актриса, балки продюсер сифатида ҳам синаб кўрмоқда. Лопес ҳозирда ўзи иштирок этаётган кўплаб кино лойиҳаларини яратиш устида ишламоқда.
Хонанда
Ло қўшиқчи сифатида фақат 1999 йилга келибгина дебют қилади, аммо бу катта муваффақиятларга эришишига тўсқинлик қилмайди. Оn the 6 деб номланган биринчи альбоми (болалигида вокал мактабига борадиган метро йўналиши рақами) Billboard рейтингида 10-ўринни эгаллайди. If You Had My Love хити эса бир неча ҳафта давомида жаҳон чартларининг биринчи қаторида туради.
Икки йил ўтгач, қўшиқчи ўзининг иккинчи J.Lo номли альбомини чиқаради, буниси аввалгисидан ҳам машҳурроқ бўлади. Айтганча, юлдуз бир неча марта “Гремми” мукофотига номзод бўлган. Яккахон ижодидан ташқари, у бошқа санъаткорлар билан ҳамкорликдаги треклари билан ҳам мухлисларини хурсанд қилади. У жами 8 та альбом чиқарган.
“Мен учун муваффақият бу — доимий эволюция, қулайлик зонасидан чиқиш ва янги нарсалар устида ишлаш”, — дейди Лопес.
Саҳнада Женнифер нафақат ўзининг хитларини ижро этади, балки ҳақиқий шоу ҳам намойиш этади — бунинг тасдиғи унинг Super Bowl 2020 даги чиқишидир.
Ишбилармон аёл
Женнифер Лопез банд бўлишига қарамай, муваффақиятли ишбилармон аёл ҳамдир. У аксессуарлар, кийим-кечак ва парфюмерия ишлаб чиқарадиган JLo by Jennifer Lopez компаниясига эгалик қилади. Юлдуз, шунингдек, ўзининг косметик брендига ва Калифорнияда жойлашган Madre’s ресторанига эга. Бу йил эса ижрочи Delola коктейлларининг янги брендини тақдим этди.
Женнифер Лопеснинг шахсий ҳаёти
Карьераси билан бир қаторда Женнифернинг шахсий ҳаёти ҳам тўхтаб қолгани йўқ — у тўрт марта турмушга чиқади. Унинг биринчи эри официант Охани Ноа эди, юлдуз уни Майами ресторанида учратган. 1998 йилда тўйдан кейин бир йил ўтмай жуфтлик ажралишга қарор қилади. Уларнинг ажрашиши кучли жанжал билан тугайди. Охани собиқ рафиқасидан биргаликдаги ҳаётлари ҳақидаги китоб учун 5 миллион доллар талаб қилади. Женнифер унга қарши даъво қўзғатади, чунки Ноа юлдуз билан никоҳи ҳақида гапириш тақиқланган келишувни бузганди.
Лопеснинг иккинчи турмуш ўртоғи раққос Крис Жадд бўлиб, уларнинг тўйи 2001 йилда бўлиб ўтган. Севишганлар ўртасидаги муносабатлар Love Don’t Cost a Thing клипи суратга олинаётганда пайдо бўлади. Бироқ уларнинг бахти узоққа чўзилмайди — 2002 йилда эр-хотин ажрашиш ҳақида эълон қилишади. Ажралиш сабаби журналистларнинг диққат-эътиборида бўлиш эди, Крис бунга чидай олмайди. Жей Ло уларнинг шахсий ҳаёти тафсилотларини овоза қилмаслиги учун Крис Жаддга тахминан 18 миллион доллар тўлайди.
2004 йилда машҳур қўшиқчи Марк Энтони билан турмуш қуради. Бу никоҳдан эр-хотиннинг икки фарзанди — эгизаклар Эмма ва Макс дунёга келади. Бироқ ўн йил ўтгач улар муносабатларга чек қўйишга қарор қилишади. Лопез ажралишнинг ташаббускори бўлганини тан олади, аммо ажралиш унинг учун жуда қийин эди.
“Мен ҳеч қачон кўзим ости кўкарган ёки шишган лаб билан кўринмаганман, лекин зўравонликни ақлий, ҳиссий, оғзаки шаклда ҳис қилганман”, — дейди хонанда.
Учинчи ажралишдан сўнг Женнифер Лопез бейсболчи Алекс Родригес билан учраша бошлайди. Хонанда спортчига турмушга чиқишга тайёргарлик кўраётган эди, аммо 2021 йилда севишганлар тўрт йиллик муносабатлардан кейин ажралишади.
Бен Аффлек билан муносабатлари қандай?
Женнифер Лопез ва Бен Аффлек 2002 йил июль ойида улар бош ролни ижро этган “Жижли” ромкомида танишган. Ва ўша йилнинг октябрь ойида юлдузлар ҳамкорликни давом эттирди — Бен Жей Лонинг Jenny from the Block қўшиғи клипида суратга тушади. Уларнинг муносабатлари тез ривожлана бошлайди, бир йил ўтгач, 2003 йилда Бен севгилисига турмуш қуришни таклиф қилади. Бироқ юлдузли тўйдан бир кун олдин бутун дунё эр-хотиннинг кутилмаган ажралиши ҳақида хабар топади.
17 йил давом этган айрилиқдан сўнг 2021 йилда уларнинг муносабатлари янги иштиёқ билан авж олади. Бу вақтга келиб, Женнифер ва Бен аллақачон оилавий ҳаётнинг мустаҳкам тажрибасига эга эди ва улар бирга бўлишни хоҳлашларини аниқ билишарди. 2022 йилнинг ёзида юлдузлар Лас-Вегасда яширинча никоҳдан ўтади, кейинроқ барча дўстлари ва танишлари таклиф қилинган ажойиб маросим ўтказишади. Айтганча, тўй Аффлекнинг Жоржия штати Рисеборо шаҳридаги уйида бўлиб ўтади.
Сўнгги пайтларда тармоқдаги юлдузли жуфтлик атрофида миш-мишлар доимий равишда тарқалмоқда. Миш-мишларга кўра, эр-хотин ажралиш арафасида. Гап шундаки, бир неча марта уларнинг жанжаллашаётганини кўришган. Аввалига Женнифер ва Бен “Грэмми” маросимида жанжаллашиб, бир оздан кейин машинада ҳамманинг кўз олдида уришишган. Лопес ҳатто ажралиш бўйича адвокатга ҳам мурожаат қилади. Бироқ сал олдин улар тўйларининг бир йиллигини нишонлаш учун ресторанга боришгани маълум бўлди.
Изоҳ (0)