Сурхондарё вилояти Денов туманида фуқароларни хорижий давлатга ишлаш учун жўнатишни ваъда қилган шахсга жиноят иши қўзғатилди. Бу ҳақда вилояти ИИБ ахборот хизмати хабар берди.
Маълум қилинишича, Олтинсой туманида яшовчи 34 ёшли Б.Б. туман ИИБга ариза билан мурожаат қилиб, унда Денов туманида яшовчи 50 ёшли Б.Ж. Германия давлатига ишга жўнатишини ваъда қилиб, 2022 йил октябрь ойида, 4,1 минг доллар пулини олиб, ўзлаштириб кетганини билдирган.
Бундан ташқари, фуқаро Б.Ж. Олтинсой туманида яшовчи 34 ёшли С.С.дан Канадага ишга жўнатишини ваъда қилиб, 2022 йил февраль ойида 6 250 доллар пулини олган.
Мазкур ҳолат юзасидан Б.Ж.га нисбатан Жиноят кодексининг 168-моддаси (фирибгарлик) 3-қисми “б” банди билан жиноят иши қўзғатилган.
Хорижга ишлаш учун кетган ўзбекистонликлар
Камбағалликни қисқартириш ва бандлик вазирлигига кўра, 2022 йилда 60 мингга яқин ўзбекистонлик бошқа давлатларга ишлаш учун кетган. Қайд этилишича, мамлакат аҳолисининг 2 миллион нафардан кўп қисми бошқа давлатларда турли соҳаларда меҳнат қилмоқда.
Июнь охирларида бир гуруҳ Ўзбекистон фуқаролари ишлаш мақсадида Германияга бориб, қийин аҳволда қолгани ҳақида хабарлар тарқалганди. Унда 300 га яқин ёшлар ишлаш учун бориб сарсон бўлиб юргани, қаерга боришини билмай бир неча кундан бери вокзалда тунаётгани айтилган. Июль бошида бўлса, Ташқи меҳнат миграцияси агентлиги фуқароларни хорижда ишга жойлаштириш ваколатига эга бўлмаган ташкилотлар билан шартнома тузмасликка чақирди.
Изоҳ (0)