Surxondaryo viloyati Denov tumanida fuqarolarni xorijiy davlatga ishlash uchun jo‘natishni vaʼda qilgan shaxsga jinoyat ishi qo‘zg‘atildi. Bu haqda viloyati IIB axborot xizmati xabar berdi.
Ma’lum qilinishicha, Oltinsoy tumanida yashovchi 34 yoshli B.B. tuman IIBga ariza bilan murojaat qilib, unda Denov tumanida yashovchi 50 yoshli B.J. Germaniya davlatiga ishga jo‘natishini vaʼda qilib, 2022-yil oktabr oyida, 4,1 ming dollar pulini olib, o‘zlashtirib ketganini bildirgan.
Bundan tashqari, fuqaro B.J. Oltinsoy tumanida yashovchi 34 yoshli S.S.dan Kanadaga ishga jo‘natishini vaʼda qilib, 2022-yil fevral oyida 6 250 dollar pulini olgan.
Mazkur holat yuzasidan B.J.ga nisbatan Jinoyat kodeksining 168-moddasi (firibgarlik) 3-qismi “b” bandi bilan jinoyat ishi qo‘zg‘atilgan.
Xorijga ishlash uchun ketgan o‘zbekistonliklar
Kambag‘allikni qisqartirish va bandlik vazirligiga ko‘ra, 2022-yilda 60 mingga yaqin o‘zbekistonlik boshqa davlatlarga ishlash uchun ketgan. Qayd etilishicha, mamlakat aholisining 2 million nafardan ko‘p qismi boshqa davlatlarda turli sohalarda mehnat qilmoqda.
Iyun oxirlarida bir guruh O‘zbekiston fuqarolari ishlash maqsadida Germaniyaga borib, qiyin ahvolda qolgani haqida xabarlar tarqalgandi. Unda 300 ga yaqin yoshlar ishlash uchun borib sarson bo‘lib yurgani, qayerga borishini bilmay bir necha kundan beri vokzalda tunayotgani aytilgan. Iyul boshida bo‘lsa, Tashqi mehnat migratsiyasi agentligi fuqarolarni xorijda ishga joylashtirish vakolatiga ega bo‘lmagan tashkilotlar bilan shartnoma tuzmaslikka chaqirdi.
Izoh (0)