Фарғонада такси ҳайдовчиси машинасига ғишт отган эркак ушланди. ИИБ ходимларига эса хизмат текшируви тайинланди (видео)

Фарғона шаҳрида эркак телефонига жавоб бермаган Yandex ҳайдовчиси машинасига ғишт отиб, шикастлагани тўғрисида хабар берилганди. Фарғона вилояти ИИБнинг маълум қилишича, гумонланувчи шахс қўлга олинган.

1 август куни Фарғона шаҳрида яшовчи фуқаро Ш.С. Yandex’га такси буюртма қилган ҳамда буюртмани мазкур фирма ҳайдовчиси, Фарғона шаҳрида яшовчи 21 ёшли И.Р. қабул қилиб, бир оздан сўнг ўз бошқарувидаги Cobalt’да С.Ш. турган кўчага етиб келган.

Бироқ фуқаро Ш.С. ҳайдовчининг телефон аппарати ўчиб қолгани ва унинг қўнғироғига жавоб бермаганидан жаҳли чиққан ва у билан ўзаро жанжаллашиб, I.Р.нинг автомашинаси ойналарини тош билан уриб синдирган. Жанжал содир бўлган жойда ички ишлар ходимларининг бўлгани ва улар вазиятни бартараф этиш бўйича қатъий чора кўрмагани ижтимоий тармоқларда кенг муҳокамаларга сабаб бўлди.

“Кечирасизлар, қизишиб кетиб, бир-биримизни тушунмадик. Қонунни бузганимиз учун мана, жазосини олиб, жавоб бериб ўтирибмиз. Пушаймонман, ҳаммадан узр сўрайман, бошқа қайтарилмайди”, — дейди Ш.С.

Ҳолат юзасидан Жиноят кодексининг 277-моддаси (безорилик) 3-қисми билан жиноят иши қўзғатилган, шунингдек, Жиноят-процессуал кодексининг 221-моддаси тартибида ушланган. Мазкур ҳолатда ички ишлар органлари ходимларининг хатти-ҳаракатлари юзасидан хизмат текшируви тайинланган.

Июль охирларида Шавкат Мирзиёев Фарғона вилоятида жиноятчилик ва ҳуқуқбузарликларга қарши курашиш ишлари қониқарсизлигини танқид қилганди. Фаолиятида йўл қўйган камчиликлар учун Фарғона вилояти ички ишлар бошқармаси бошлиғи М. Жўраев лавозимидан озод этилган.