Сурхондарё вилояти Экология бошқармаси бошлиғи бошчилигидаги тезкор гуруҳ томонидан икки ўрмон хўжалиги фаолиятини ўрганиш давомида бир қатор қонунбузилиш ҳолатлари аниқланди.
Жумладан, биринчи кунда “Боботоғ” давлат ўрмон хўжалиги “Файзова” бўлимининг 1-А айланма 2-квартал ўрмон фонди ер майдонида ўрганиш ишлари олиб борилганда, ушбу ҳудуд ўрмончиси М.М.нинг ўз ишига совуққон ёндашиши, масъулиятсизлиги оқибатида Ўзбекистон Қизил китобига киритилган, табиий ҳолда ўсувчи 893 туп тожик кавраги ўсимлигининг 2-3 маротаба шираси олингани, бундан ташқари 163 туп тожик каврак ўсимлиги ширасини олиш мақсадида димлаб қўйилгани кузатилган.
Шахси номаълум бўлганлар бу ҳаракати билан ўсимлик дунёсига 442 миллион 35 минг сўм зарар етказган.
Ўрганиш ишларининг иккинчи кунида “Файзова” ўрмон бўлимининг 5-айланма 6-квартал ўрмон фонди ер майдонида, ушбу ҳудудга жавобгар ўрмончи А.Ж.нинг эътиборсизлиги оқибатида 830 туп туп тожик кавраги шираси 5-6 маротаба кесиб олингани аниқланган.
Натижада ўсимлик дунёсига 410 миллион 850 минг сўм зарар етказилган.
Ўтказилган тезкор тадбирлар давомида 10 га яқин чайлалар бузиб ташланган.
Тожик кавраги қандай ўсимлик ва уни асраш нега бунчалик муҳим?
Ўзбекистон ҳудудида ҳозирда 4500, улар орасида жиддий муҳофазага муҳтож 300 дан ортиқ камёб эндемик ва реликт турлар мавжуд. Умумий ҳолат нисбатан яхши бўлишига қарамай, кўплаб ёввойи турларнинг, хусусан, доривор ўсимлик — тожик кавраги табиий захиралари кескин камайиб кетмоқда.
Кавракнинг елим-смоласи тиббиётда томир тортиши, ўпка сили, ўлат, захм, кўкйўтал, тиш оғриғи, асаб ва бошқа касалликларга қарши дори ҳамда қувват берувчи воситаси сифатида фойдаланилади. Табиий ҳолда ўсувчи бу турнинг бутунлай йўқ бўлиб кетишини олдини олиш мақсадида у Ўзбекистон Қизил китобига киритилган ва президентнинг 2023 йил 16 февралдаги фармони билан уч йил муддатга мораторий эълон қилинган.
Шунга қарамай, айрим фуқаролар томонидан қонун талаблари қўпол равишда бузилмоқда.
Изоҳ (0)