Ўзбекистонда олинадиган чучук (ичимлик) сувнинг қарийб 90 фоизи қишлоқ хўжалигида фойдаланилиб, ҳар гектарга сув сарфи технологик илғор давлатларга нисбатан 2—2,5 баробар кўп. Бу ҳақда Олий Мажлис Сенати кенгашининг навбатдаги мажлисида маълум қилинди.
Сенат ахборот хизмати хабарига кўра, йиғилишда муҳокама қилинган масалалардан бири сув ресурсларидан оқилона фойдаланиш тўғрисида бўлган.
Мажлисда сув ресурсларидан тежамли фойдаланиш соҳасида амалга оширилган ишлар натижасида республикада сув сарфи ўтган асрнинг 90 йилларига нисбатан йилига 64 миллиард куб метрдан ҳозирги кунда ўртача 51 миллиард куб метргача камайтирилгани айтилган. Шу билан бирга, мулоқотда авваллари ҳар бир гектар суғориладиган майдонга ўртача 16 минг куб метр сув ишлатилган бўлса, ҳозирда бу кўрсаткич 10 минг куб метргача туширилгани ҳам таъкидланган.
“Бироқ эришилган ижобий натижалар билан бирга, соҳада ҳал қилиниши лозим бўлган қатор муаммолар сақланиб қолмоқда. Жумладан, мамлакатимизда олинадиган чучук сувнинг қарийб 90 фоизи қишлоқ хўжалигида фойдаланилиб, ҳар гектарга сув сарфи технологик илғор давлатларга нисбатан 2—2,5 баробар кўп. Ирригация тизимларидаги носозликлар туфайли экин майдонларига сув етказиб беришда сезиларли йўқотишлар мавжуд”, — дейилади манба хабарида.
Эслатиб ўтамиз, 4—5 август кунлари Сенатнинг 43-ялпи мажлиси бўлиб ўтади. Мажлисда гидротехника иншоотлари, суд, адвокатура, волонтёрлик, ҳайвонот дунёсини муҳофаза қилиш, ветеринария ва бошқа масалаларга оид қонунлар кўриб чиқилади.
Изоҳ (0)