Ҳайдовчилик гувоҳномасини олиш тартиби: имтиҳонлар, бир оз ошган тўловлар

Миллий ҳайдовчилик гувоҳномаларини бериш хизмати Ягона интерактив давлат хизматлари портали (my.gov.uz) орқали Давлат йўл ҳаракати хавфсизлиги хизмати органлари ёки Давлат хизматлари марказлари томонидан кўрсатилади.

Ҳайдовчилик гувоҳномасини олиш учун фуқаро белгиланган тартибда ариза билан мурожаат қилади. 2023 йил 1 майдан базавий ҳисоблаш миқдори (БҲМ) 300 минг сўмдан 330 минг сўмга оширилди. Шунинг учун сўнгги 3 ойда “права” олиш харажатлари ҳам бир оз ошган. Хусусан, давлат хизматлари кўрсатилгани учун БҲМ 10 фоизи, яъни 33 000 сўм миқдорида йиғим ундирилади.

Ҳайдовчилик гувоҳномаси назарий ва амалий имтиҳонларни муваффақиятли топширган талабгорларга берилади. Бунда қуйидаги миқдорда тўловлар амалга оширилади:

• назарий имтиҳон топшириш учун — БҲМнинг 10 фоизи;
• ҳар бир қайта назарий имтиҳон топшириш учун — БҲМнинг 15 фоизи (46 500 сўм);
• автомототранспортларни, шу жумладан, транспорт воситалари таркибини амалий бошқаришда имтиҳон топшириш учун — БҲМнинг 10 фоизи;
• ҳар бир қайта амалий бошқаришда имтиҳон топшириш учун — БҲМнинг 15 фоизи.

Ариза берувчи назарий имтиҳондан ўтган тақдирда, унга дарҳол автоматик тарзда амалий имтиҳонга рухсат берилади ҳамда 2 ойлик муддат ичида амалий имтиҳонни топшириши лозимлиги ҳақида огоҳлантирилади.

Агар назарий имтиҳондан ўта олмаса, 7 кундан сўнг имтиҳонни такроран топшириши мумкин.

Амалий имтиҳонлар сунъий онг орқали баҳоланадиган фақат махсус ташкил этилган автодромда олинади.

Ариза берувчи назарий ва амалий имтиҳонларни муваффақиятли топширгач, унга миллий ҳайдовчилик гувоҳномаси берилади. Мазкур гувоҳномани бериш учун БҲМнинг 70 фоизи (231 000 сўм) миқдорида йиғим ундирилади.