Нигерда ҳарбийлар президент Муҳаммад Базумни ағдарганидан кейин Европа Иттифоқи ушбу мамлакатдан ўз фуқароларини эвакуация қилишга қарор қилди. Бу ҳақда Европа дипломатияси раҳбари Жозеп Боррел айтиб ўтди.
“Ҳозирча биз Нигер бюджетини қўллаб-қувватлашни, шунингдек, хавфсизлик бўйича ҳамкорликдаги барча тадбирларни тўхтатишга қарор қилдик. Европа фуқароларини ватанига қайтаришга ҳам қарор қилдик ва бу операцияни амалга оширяпмиз”, — деб ёзади у.
Бундан ташқари, Европа Иттифоқи Ғарбий Африка мамлакатлари иқтисодий ҳамжамиятининг (ECOWAS) Нигерда “конституциявий тузумни тиклаш” ҳақидаги қарорларига қўшилади, деб таъкидлади Боррел.
Июль ойи охирида ташкилот Нигердаги ҳарбий тўнтариш иштирокчиларидан бир ҳафта ичида мамлакатда конституциявий тузумни тиклашни ва Базумни озод қилишни талаб қилганди. ECOWAS, агар талаблар бажарилмаса, вазиятга куч билан аралашишни истисно қилмаган.
ECOWAS — Ғарбий Африкадаги 15 та давлатнинг минтақавий иттифоқи. Унга Бенин, Гамбия, Гана, Гвинея-Бисау, Кот-дъИвуар, Кабо-Верде, Либерия, Нигер, Нигерия, Сенегал, Серра-Леоне, Того, Буркина-Фасо, Гвинея ва Мали киради (охирги учта мамлакатнинг иттифоққа аъзолиги ҳарбий тўнтаришлардан кейин тўхтатиб қўйилган).
Нигерда 26 июль куни давлат тўнтариши бўлиб ўтди, исёнчилар президент Муҳаммад Базум ҳокимиятдан четлатилгани ва ҳибсга олинганини эълон қилди. Улар чегараларни ёпди ва комендантлик соати жорий қилди. Президент гвардияси бошлиғи Абдураҳмон Чиани ўзини янги раҳбар деб эълон қилди.
БМТ, АҚШ, Европа Иттифоқи ва Африка Иттифоқи исёнчиларнинг ҳаракатларини қоралади. Вашингтон Нигер билан хавфсизлик соҳасида ҳамкорликни тўхтатиш, ЕИ эса молиявий ёрдамни тўхтатиш билан таҳдид қилди. Шу билан бирга, Буркина-Фасо ва Мали қўшма баёнот чиқариб, Нигер ички ишларига аралашувни уруш эълон қилиш деб ҳисоблашини айтди.
Изоҳ (0)