Нигердаги ҳарбий исён тарафдорлари мамлакат парламенти биноси олдида митинг уюштирди. Уларнинг айримлари Россия байроқларини кўтариб олганди, деб ёзмоқда BBC.
Митингчиларнинг бир қисми ҳокимиятдан ағдарилган президент Муҳаммад Базумнинг партияси қароргоҳига ҳужум қилиб, унга ўт қўйди.
26 июль куни кечқурун Базум ва унинг рафиқаси ўз қароргоҳида президент гвардияси томонидан ҳибсга олинган эди. Эртаси куни ҳарбийлар Базум лавозимидан четлатилганини ва мамлакат чегаралари ёпилганини эълон қилди.
Бошқа мамлакатлар қатори расмий Россия президент Базумни озод этишга чақирган. Митингчиларнинг Россия байроқларини кўтариб олиши сабаблари ноаниқ.
Айни вақтда Ғарбий Африканинг ушбу мамлакатини ким бошқараётгани ҳам тушунарсиз. Армия қўмондони исёнчиларни қўллаган, ўзининг айтишича, мамлакат Қуролли кучлари бирлигини сақлаш ва қон тўкилишига йўл қўймаслик учун шундай қилган.
Хунтанинг ўзи ҳам раҳбари кимлигини эълон қилмаган.
Давлат телевидениесида президент ағдарилгани тўғрисидаги ҳарбийлар мурожаати ватанпарварлик руҳидаги мусиқа ва Қуръон оятлари билан аралаштириб такроран қўйиб берилган. Одатда тушлик вақти эфирга чиқадиган янгиликлар дастури 27 июль куни намойиш этилмаган
Аммо Нигер пойтахти Ниамейда дўконлар ва бозорлар одатдаги вақтда очилган, эрталабки ёмғирдан кейин эса исёнчиларнинг тарафдорлари кўчаларга чиққан.
Юзлаб намойишчилар Миллий ассамблея (парламент) биноси олдида тўпланган. Уларнинг айримлари байроқларни ҳилпиратган, бошқалари “Франция йўқолсин!” ва “Хориж базалари даф бўлсин!” ёзувлари акс этган плакатларни кўтариб олган.
Маълумот учун, Нигер 1960 йилга қадар Франция мустамлакаси бўлган ва ҳозиргача бу ерда французлар таъсири ва ҳарбий базалари сақланиб қолган.
Уран рудасига бой бўлган ушбу мамлакат — Ғарбнинг Саҳелдаги (Саҳройи Кабир жанубига туташган минтақа) асосий ҳамкорларидан бири, бу ерда нафақат французларнинг, балки маҳаллий ҳукуматга қуролланган радикал гуруҳларга қарши курашда ёрдам берувчи Америка қўшинлари базаси ҳам жойлашган.
Изоҳ (0)