Америкалик консерватив фаоллар гуруҳи бўлган Judicial Watch раҳбари Том Фиттоннинг айтишича, 2021 йилда Капитолийга уюштирилган босқин билан боғлиқ жиноий иш бўйича АҚШнинг собиқ президенти Дональд Трампга қўйилган айбловлардан сўнг, 2024 йилда адолатли сайловлар ўтказиб бўлмайди.
“Очиғини айтайлик: бу айблов Демократик партиянинг истисносиз барча сиёсий рақибларига яширин таҳдид ва қўрқитиш ҳаракатидир. Байден режими: ‘Агар сиз сайловларда иштирок этсангиз сизни қамоққа ташлаймиз’ демоқчи бўляпти. 2024 йилги сайловларни эркин ва адолатли ўтказиш расман иложсиз", — деди Фиттон гуруҳ веб-сайтидаги баёнотида.
Консерватив фаоллар гуруҳи раҳбарининг айтишича, Трампга қўйилган айбловлар уйдирма ва “нохолис ҳамда сиёсий суиистеъмолликка тўлиқ мос келади”.
Трамп тўртта модда бўйича айбланмоқда: давлатни алдаш мақсадида фитна уюштириш, расмий жараёнга тўсқинлик қилиш учун фитна уюштириш, расмий жараёнга тўсқинлик қилишга уриниш ва ҳуқуқларни бузиш учун тил бириктириш.
3 август куни Трамп Вашингтон полициясига таслим бўлиши ва эҳтиёт чорасини белгилайдиган судья ҳузурига келиши керак.
Республикачи Дональд Трамп 2020 йил ноябрида бўлиб ўтган президентлик сайловларида демократ Жо Байденга ютқазган эди. Трамп бир неча ой давомида мағлубиятни тан олишдан бош тортди ва сайлов сохталаштирилгани ҳақидаги асоссиз даъволарни тарқатди.
2021 йилнинг 6 январида — овоз бериш натижалари Конгресс томонидан тасдиқланган куни — Трамп тарафдорлари Капитолийга бостириб кириб, йиғилишни бузганди.
Изоҳ (0)