Беларуснинг иккита вертолёти 1 август куни Польша ҳаво ҳудудини бузди. Бу ҳақда Польша миллий мудофаа вазирлиги хабар берди.
Вертолётлар машғулотлар ўтказган ва бу ҳақда Беларусь томони Польшани олдиндан хабардор қилган. Ҳаво чегарасини кесиб ўтиш Беловежа аҳоли пункти ҳудудида жуда паст баландликда содир бўлган, бу эса радар тизимлари томонидан аниқлашни қийинлаштирган.
Польша мудофаа вазири Мариуш Блашак чегарадаги қўшинлар сонини кўпайтириш ва қўшимча маблағ, жумладан, жанговар вертолётлар ажратиш бўйича кўрсатма берди.
Воқеа ҳақида НАТО ҳам хабардор қилинган. Польша Ташқи ишлар вазирлиги нима бўлганини тушунтириш учун Беларусь бўйича муваққат ишлар вакилини чақиртирган.
Беларусь вертолётлари Польша ҳудудига учиб ўтгани ҳақида дастлаб OSINT таҳлилчилари хабар берганди. Гап Ми-24 ва Ми-8 вертолётлари ҳақида кетмоқда.
Сўнгги ҳафталарда Беларусга “Вагнер” колоннаси келишни бошлади. 20 июль куни Беларусь Мудофаа вазирлиги армия махсус операциялар кучлари Польша чегараси яқинидаги Бресцкий полигонида “Вагнер” билан машғулотлар ўтказишини маълум қилди.
Изоҳ (0)