Учинчи жиноий иш: Трамп Капитолийга уюштирилган босқинда айбдор деб топилди

АҚШ собиқ президенти Дональд Трампга 2021 йил 6 январда Капитолийга уюштирилган босқин билан боғлиқ жиноий иш бўйича расман айблов эълон қилинди. Бу ҳақда махсус мустақил прокурор Жек Смит тақдим этган ҳужжатдан маълум бўлди. Федерал Катта ҳакамлар ҳайъати айбловни ёқлаб овоз берган.

Трамп тўртта моддада айбланмоқда: давлатни алдаш мақсадида фитна уюштириш, расмий жараёнга тўсқинлик қилиш учун фитна уюштириш, расмий жараёнга тўсқинлик қилишга уриниш ва ҳуқуқларни бузиш учун тил бириктириш.

Прокурорларнинг таъкидлашича, Трамп ўзининг Жо Байден устидан ғалаба қозонгани ҳақидаги иддаолари ёлғон эканини билган, бироқ у Америка жамиятида “ишончсизлик ва ғазаб муҳитини” яратиш ҳамда “жамоатчиликнинг сайлов жараёнига бўлган ишончини сўндириш” мақсадида ўз даъволарини такрорлаган, деб ёзади Reuters.

The New York Times хабарига кўра, айблов ҳужжатида Трамп сайловда “мағлубиятга учраганига қарамай, ҳокимиятда қолишга қатъий қарор қилгани” очиқ таъкидланган.

Собиқ президент билан бирга исм-шарифи ошкор этилмаган олти киши, жумладан, “сайловни сохталаштириш ҳақидаги асоссиз даъволарни тарқатган” адвокатлар ҳам айбланган. Айблов хулосасида Смитнинг таъкидлашича, Трамп Капитолийга бостириб киришни “аҳмоқлик“ деб атаган бўлса-да, исённинг ёйилишида иштирок этган.

3 август куни Трамп Вашингтон полициясига таслим бўлиши ва эҳтиёт чорасини белгилайдиган судья ҳузурига келиши керак.

Республикачи Дональд Трамп 2020 йил ноябрида бўлиб ўтган президентлик сайловларида демократ Жо Байденга ютқазган эди. Трамп бир неча ой давомида мағлубиятни тан олишдан бош тортди ва сайлов сохталаштирилгани ҳақидаги асоссиз даъволарни тарқатди. 2021 йилнинг 6 январида — овоз бериш натижалари Конгресс томонидан тасдиқланган куни — Трамп тарафдорлари Капитолийга бостириб кириб, йиғилишни бузди.

Бу Трампга нисбатан очилган учинчи жиноий иш. Апрель ойида Манхеттен округидаги Катта ҳакамлар ҳайъати бизнес ҳисоботларини сохталаштириш бўйича, июнь ойида адвокат Смит Трамп қароргоҳларида махфий ҳужжатларнинг ноқонуний сақланиши бўйича иш очганди.

Трамп бўлажак сайловларда Республикачилар партиясидан президентликка асосий даъвогар ҳисобланади. Агар у айбловларнинг бирортаси бўйича айбдор деб топилиб, қамоққа жўнатилган тақдирда ҳам бу уни АҚШ президентлигига номзод бўлиш ҳуқуқидан маҳрум қилмайди.