Хитойда мамлакат ядровий кучлари қўмондонлигидаги икки нафар юқори мартабали офицер лавозимидан озод этилди. Бу ҳақда BBC хабар берди.
Халқ озодлик армиясининг ракета қўшинлари раҳбари генерал Ли Ючао ва унинг ўринбосари Лю Гуанбин бир неча ой давомида омма олдида кўриниш бермади.
Уларнинг ўрнига аввал Ҳарбий-денгиз флоти бошлиғи ўринбосари лавозимида ишлаган Ван Хоубинг ва партия марказий қўмитаси аъзоси Сюй Сишен тайинланди.
Ёз бошида худди шундай тушунарсиз тарзда мамлакат ташқи ишлар вазири Син Ган ғойиб бўлганди. У бир ой давомида омма олдига чиқмаган. Бир неча ҳафта ўтгач, унинг ўрнига аввалроқ ташқи ишлар вазири бўлган Ван И тайинланган.
Син Ганнинг истеъфога чиқиш сабаблари ҳеч қачон тушунтирилмаган. Бу Хитой ҳарбий раҳбариятидаги сўнгги ўн йилликдаги энг катта режадан ташқари ўзгаришлардир. Таҳлилчилар армия сафларида бошланган “тозалаш” ҳақида тахмин қилмоқда.
“Ушбу тозалаш муҳим... чунки Хитой ядро стратегиясида ўнлаб йиллардаги энг чуқур ўзгаришлардан бирини амалга оширмоқда. Си Цзиньпин мисли кўрилмаган тарзда армия устидан назоратни мустаҳкамлади, аммо бу жараён тугалланди, дегани эмас.
Си партия сафидаги коррупциядан ҳануз хавотирда ва у партияга мутлақ содиқлик ҳали йўқлигини кўрсатди”, — дейди Нью-Йоркдаги Осиё жамияти сиёсати институтининг ташқи сиёсат ва миллий хавфсизлик бўйича мутахассиси Лайл Моррис.
Ли Ючао ва Лю Гуанбиннинг қаерда экани ҳақида ҳеч қандай маълумот йўқ, бироқ ўтган ҳафта Гонконгда жойлашган South China Morning Post нашри номи ошкор этилмаган манбаларга таяниб, коррупцияга қарши кураш комиссияси генераллар устидан ҳам тергов бошлаганини айтганди.
Изоҳ (0)