Украинада президент Владимир Зеленскийнинг ҳаётига қасд қилинган тақдирда, мамлакат бошқарувини қандай олиб бориш режаси мавжуд, деб ёзмоқда Politico экспертлар ва украиналик расмийлар билан суҳбатларга таяниб.
Украина Конституциясининг 112-моддасига кўра, президентнинг ваколатлари муддатидан олдин тугатилган тақдирда, унинг кейинги сайловгача бўлган вазифаларини Украина Олий Радаси раиси ўз зиммасига олади.
Бироқ Олий Раданинг амалдаги раиси – Зеленскийнинг “Халқ хизматкори” партияси аъзоси Руслан Стефанчук ижтимоий сўровларда юқори рейтингга эга эмас, унга мамлакат фуқароларининг атиги 40 фоизи ишонади, деб таъкидлайди Politico. У мухолифатчи қонунчилар орасида ҳам машҳур эмас.
Аммо Зеленский вафот этган тақдирда, бу муҳим аҳамият касб этмайди. Украинада назоратни ўз қўлига олишга қодир бўлган “кучли етакчилар жамоаси бор”, деб ёзади Politico. Ушбу коллектив орган таркибига вакиллик функцияларини бажарадиган Стефанчук, Зеленский офисининг раҳбари Андрей Ермак, ташқи ишлар вазири Дмитри Кулеба ва мудофаа вазири Алексий Резников кириши мумкин.
Владимир Зеленскийдан Россия уни ўлдиришга уринишидан хавотирдами ёки йўқлиги сўралганда, у бу ҳақда ўйламаслигини айтди.
“Агар мен бу ҳақда доим ўйлаб юрганимда, ўзимни панага олардим, худди ҳозир бункердан чиқмаётган Путин каби. Албатта, қўриқчиларим бунинг олдини олиш йўлини ўйлаши керак ва бу уларнинг вазифаси. Бу ҳақда мен ўйламайман”, — деди Украина раҳбари CNN телеканалига берган интервьюсида.
Изоҳ (0)