Мактаб ўқитувчилари ва тарбиячилар ойлиги нега пастлиги айтилди

Статистика агентлиги эълон қилган ахборотда 2023 йилнинг январь–июнь ойларида таълим ўртача ойлик иш ҳақи энг кам тўланадиган соҳалар қаторидани ўрин олган. Хусусан, умумий ўрта таълим мактаблари ўқитувчилари 3 миллион сўмдан, мактабгача таълим тарбиячилари 1,6 миллион сўмдан ўртача ойлик иш ҳақи олган.

Кеча, 31 июль куни АОКАда ўтказилган матбуот анжуманида мактабгача ва мактаб таълими вазирининг биринчи ўринбосари Усмон Шарифхўжаев соҳада ойликлар нега камлигининг айрим сабабларини очиқлади, дея хабар берди “Дарё” мухбири.

Усмон Шарифхўжаевнинг таъкидлашича, ўқитувчиларнинг ойлигини юқори даражага кўтариш учун давлат бюджетининг имконияти етмайди.

“Бунга жуда кўп сабаблар бор. Аммо имкон борича тизимда ишлаётган ходимларга юқори ойлик олиш учун шароит яратиб берилмоқда. Яъни ўқитувчи турли таълим сертификатларига эга бўлса, ойлигини кўтара олади. Лекин бир вақтнинг ўзида барча ўқитувчиларнинг ойлигини ошириш учун давлат бюджетида имконият йўқ. Агар ойликларга 1 миллион сўмдан қўшилса ҳам, статистикадаги ўринларда жуда юқори кўтарила олмаймиз. Лекин фақат мактаб ўқитувчилари ойлигига 1 миллион сўм қўшиш, бюджетга йилига қўшимча 5 триллион сўм харажат бўлади дегани. Ҳозир бизнинг тизимга ажратилаётган маблағ миқдори салкам 30 триллион сўм. Албатта, энг яхши устозлар учун имкониятлар оширилмоқда. Аммо ойликларни оммавий ошириш учун иқитисодиёт янада ривожланиши, солиқ тўловчилар вақтида, тўлиқлигича солиқларини тўлаши керак бўлади”, — деди вазир ўринбосари.

Қўшимча қилинишича, боғча соҳасида табақалаштирилган тизимни йўлга қўйиш ишлари кетмоқда. Айни пайтда Ўзбекистондаги боғчаларда олий маълумотли тарбиячиларнинг умумий улуши 34 фоизни ташкил этади. Уларнинг ойлиги 2024 йил 1 июндан бошлаб мактаб ўқитувчилари ойлигига тенглаштирилади.

• Айни пайтда Ўзбекистонда 10 минг 296 та мактаб ва 29 минг 420 та боғча мавжуд бўлиб, жами 8 миллион нафарга яқин ўқувчи ва тарбияланувчилар қамраб олинган.
• Уларга 700 минг нафар педагоглар таълим ва тарбия бериб келмоқда.
• Кузда бошланадиган янги ўқув йили учун мактабларга жами 732 минг нафар бола қабул қилиш режалаштирилган.