Олий Мажлис Қонунчилик палатаси депутатлари “Педагогнинг мақоми тўғрисида”ги қонун лойиҳасини иккинчи ўқишда кўриб чиқди. Бу ҳақда парламент қуйи палатаси матбуот хизмати хабар берди.
Қайд этилишича, қонун лойиҳасини иккинчи ўқишга тайёрлаш жараёнида сиёсий партиялар фракциялари мажлисларида, Фан, таълим, маданият ва спорт масалалари қўмитасининг йиғишларида тегишли вазирлик-идоралар вакиллари, соҳа мутахассисларидан иборат ишчи гуруҳ томонидан моддама-модда кўрилган, такомиллаштирилган ва қатор муҳим ўзгартиришлар киритилиб, маромига етказилган.
Қонун лойиҳасида педагогларнинг ҳуқуқлари, мажбуриятлари, улар фаолиятининг асосий кафолатлари, уларнинг меҳнатига яраша ҳақ тўлаш, рағбатлантириш ва ижтимоий ҳимоя қилиш тамойиллари белгиланмоқда.
Қонун лойиҳаси билан педагогнинг шаъни, қадр-қимматини ҳимоя қилиш масаласида муайян мансабдор шахснинг хатти-ҳаракатлари устидан судга мурожаат қилганида давлат божини тўлашдан озод этилиши, илк бор касбий фаолият бошлаётган шахсга бир ўқув йили даврига ўқитувчи-мураббийликни амалга оширувчи педагог ходимни бириктирилиши ва бириктирилган мазкур педагогга қўшимча ҳақ тўланиши каби кафолатлар ҳам мустаҳкамланмоқда. Қонун лойиҳаси депутатлар томонидан қабул қилинди.
- Шавкат Мирзиёев 27 март куни педагог ходимларнинг хизмат вазифаларини бажаришига тўсқинлик қилганлик учун жавобгарликни кучайтиришни кўзда тутувчи қонунни имзолаган эди.
- Унга кўра, педагог ходимни меҳнатга бирон-бир шаклда маъмурий тарзда мажбурлаш учун маъмурий ва жиноий жавобгарликлар кучайтирилмоқда.
- Жумладан, умумий ҳолатда бирор шахсни мажбурий меҳнатга жалб этиш 30 миллион сўмгача (100 баравар) жаримага сабаб бўлса,
- эндиликда педагогларни мажбурий меҳнатга жалб қилиш 45 миллион сўмгача (150 баравар) жарима билан жазоланиши мумкин.
Изоҳ (0)