Статистика агентлиги маълумотларига кўра, Ўзбекистонда июль ойида истеъмол секторидаги товарлар ва хизматлар ўртача 0,2 фоизга арзонлашган.
Иқтисодчи Отабек Бакировнинг ёзишича, ўтган йилнинг юқори базаси ҳисобига йиллик инфляция 8,9 фоизгача пасайган. Охирги марта бундай паст даражали инфляция 2016 йил августда қайд этилган.
Ойлик инфляция пасайиши асосан озиқ-овқатларнинг мавсумий равишда 0,9 фоизга пасайиши ҳисобига рўй берган. Ноозиқ-овқатлар 0,3 фоизга, аҳолига пуллик хизматлар кўрсатиш нархлари эса сезиларли равишда 0,5 фоизга қимматлаган (йил бошидан буён максимум).
Муҳим озиқ-овқат маҳсулотларидан гуруч (+1,7 фоиз), мол гўшти (+0,7 фоиз), қўй гўшти (+0,5 фоиз) қимматлашишда давом этмоқда. Яна бошқа гуруҳларда тамаки (+1,0 фоиз), стационар даволаниш (+1,0 фоиз), йўловчи ташиш (+0,9 фоиз), ресторан ва меҳмонхоналар (+0,6 фоиз) нархлари сезиларли даражада ошган.
Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилганди.
2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Инфляция ўзи нима?
Инфляция деганда мамлакатдаги товар ва хизматлар баҳоси умумий даражасининг ошиши (ўсиши) тушунилади. Унинг асосий кўрсаткичи истеъмол нархларининг маълум бир даврдаги ўзгариши ҳисобланади. Нархларнинг умумий даражаси кўтарилиши натижасида мамлакат пул бирлиги (миллий валюта) харид қобилиятининг пасайиши рўй беради. Бу эса ўз навбатида, давлат пул бирлигининг қадрсизланишига олиб келади.
Изоҳ (0)