“Мактабларда таълим сифати пастлигини ҳамма билади”— вазир ўринбосари Усмон Шарифхўжаев муаммони қандай ечиш мумкинлигини айтди

Ўзбекистондаги мактабларда таълим сифати юқори эмас. Сифатни ошириш учун бир қатор механизмлар мавжуд. Бу ҳақда мактабгача ва мактаб таълими вазирининг биринчи ўринбосари Усмон Шарифхўжаев АОКАдаги матбуот анжуманида айтди, дея хабар берди “Дарё” мухбири.

Усмон Шарифхўжаевнинг айтишича, таълим сифати пастлигида ота-оналар ва устозларнинг айби бор.

“Таълим сифати мактабларда юқори эмас. Буни ҳаммамиз биламиз. Мен сифат паст дегим келмаяпти, чунки устозларимиз хафа бўлишади. Таълим сифатини ошириш учун нима қилиш керак? Ўқитувчилар ўз устида ишлаб, билимини ошириб, мактабда болаларни кўпроқ дарсга йўналтириш лозим. Мактабда бериладиган билим бола олиши керак бўлган билимнинг 100 фоизи эмас. Ҳеч қачон бундай бўлмаган, бўлмайди ҳам. Бошланғич синфларда ота-она бола билан бирга дарс қилади, катта синфда эса у дарс қилдими йўқми назорат қилишмайди. Репетитор шу ерда қўл келади. Болани унга юборишади ва устида кимдир назоратчи бўлади. Репетитор – ота-онанинг функционалини алмаштирадиган механизм. Ота-оналарда ҳам, устозларда ҳам айб бор. Болаларни мустақил таълимга ўргатиш керак. Шундангина улар ҳаракат қилиб, билимга эга бўлади”, — деди вазир ўринбосари.

Усмон Шарифхўжаев репетиторлар масаласига ҳам тўхталиб ўтди.

“Мен ҳам 1990 йилларнинг охирида мактабни битирганман, Тошкент шаҳридаги репетиторга қатнаганман. Ҳозир таълим сифатига репетитор аралашуви кўпайган ёки камаймоқда, буни аниқлайдиган “критерия” йўқ. Ошяпти, дейдиганларнинг танишлари репетиторга қатнаётган бўлади. Ошмаяпти, деганларнинг хабари бўлмаган бўлиши мумкин. Ҳозир йўқ, камайган охирги йилларда, десам мен хато ҳам қилишим мумкин. Бу ҳар бир одамнинг ҳуқуқи ва қўшимча билим олиш имконияти. Агар ҳозирги ҳолатда бола мактабда белгиланган дастур бўйича таҳсил олса, ўқишга кира олади. Лекин бошқаларга нисбатан устунликка эга бўлиш учун спортчи ҳам қўшимча машғулотлар ўтказади, деб қанча ҳикоялар, мақолалар ўқиганмиз”, — деди у.

Аввалроқ давлат мактабларида бир ўқувчи учун йилига 4,5 миллион сўм сарфланаётгани айтилганди.

Маълумот учун, айни пайтда Ўзбекистонда 10 минг 296 та мактаб ва 29 минг 420 та боғча мавжуд бўлиб, жами 8 миллион нафарга яқин ўқувчи ва тарбияланувчилар қамраб олинган. Уларга 700 минг нафар педагоглар таълим ва тарбия бериб келмоқда. Кузда бошланадиган янги ўқув йили учун мактабларга жами 732 минг нафар бола қабул қилиш режалаштирилган.