Ўзбекистон давлат мактабларида янги ўқув йилида бериладиган дарсликлар учун ижара ҳақи олинмайди. Бу ҳақда мактабгача ва мактаб таълими вазирининг биринчи ўринбосари Усмон Шарифхўжаев маълум қилди, дея хабар берди “Дарё” мухбири.
Усмон Шарифхўжаевнинг айтишича, 2022 йилдан бери дарсликлар учун ижара пули олинмаяпти.
“Ўтган йилги жараёнлардан келиб чиқиб, жорий йил учун ҳам мактаб дарсликларига ижара тўловлари олинмайди. Бу бўйича президент томонидан алоҳида топшириқ берилган. Ўтган йили ҳам дарсликлар учун ижара пули олинмаган. 2022 йилда бу жараён (ижара ҳақи олиш) тўхтатилган”, — деди вазир ўринбосари.
Усмон Шарифхўжаев дарсликларни янгилаш борасидаги тартиб тўғрисида ҳам маълумот берди.
“Амалдаги қонунчиликда дарсликлар 5 йилда бир марта янгиланиши белгиланган. Шу жараённи ўзида айрим ота-оналар орасида нотўғри талқин мавжуд. Яъни берилаётган президент совғалари ичида дарсликлар ҳам совға деб тушунишади. Ундай эмас, дарсликлар давлат мулки ва уни ишлатгандан кейин қайтариш керак”, — деди у.
Мактабгача ва мактаб таълими вазирлиги ахборотига кўра, айни пайтда Ўзбекистонда 10 минг 296 та мактаб фаолият юритмоқда. Кузда бошланадиган янги ўқув йили учун мактабларга жами 732 минг нафар бола қабул қилиш режалаштирилган. Ҳозиргача топширилган ҳужжатлар сони ушбу рақамнинг 80 фоизига тенг бўлмоқда. Айни кунларда мактабларга қабул давом этяпти.
Изоҳ (0)