Ички ишлар органлари ходимлари кичик ёшдаги болаларга “оқ билан қорани ажрата олиш” ҳақида маъруза қилган Тошкентдаги мактабгача таълим ташкилоти услубчиси ва мудираси интизомий жазога тортилди.
“Gazeta.uz”нинг Мактабгача таълим агентлиги директорининг биринчи ўринбосари Фарруҳ Бобоевга таяниб ёзишича, аслида болалар билан машғулотлар махсус майдончада ўтказилиши белгиланган. Аммо учрашув нотўғри ташкил этилиб, гуруҳда ўтказилган.
“Мактабгача таълим ташкилотларида ёз ойларида мактабга тайёрлов гуруҳларимиздаги 6 ёшли болажонларимизга йўл ҳаракати қоидаларини ўргатиш, ҳарбийлар билан учрашиш, она ватанга садоқат руҳида тарбиялаш мақсадида ёзги соғломлаштириш дастурлари йўлга қўйилган. Айнан ҳар битта боғчада йўл ҳаракати қоидаларини ўргатувчи майдончалар мавжуд. [Videodagi] учрашув айнан ўша майдончада эмас, балки гуруҳда ўтказилган. Учрашув нотўғри ташкил этилгани учун тегишли мутасаддилар [bog‘cha mudirasi va uslubchisi]га нисбатан интизомий чоралар қўлланилди”, — дейди Фарруҳ Бобоев.
23 июль, якшанба куни интернетда пойтахтдаги мактабгача таълим ташкилотларидан бирида ички ишлар органлари ходимлари 3−4 ёшли болалар билан “тарбиявий соат” ўтказаётгани акс этган видео пайдо бўлди. Унда ходимлардан бири яхши инсон бўлиш, ота-онани ҳурмат қилиш, кейин афсусланмаслик учун “айтганини қилиш”, “оқ билан қорани ажрата олиш” ҳақида гапиради.
Кейинроқ маълум бўлишича, 17 июль куни Учтепа туманидаги давлат мактабгача таълим ташкилоти раҳбари томонидан туман ИИО ФМБ, мудофаа ишлари бўлими ҳамда “Фарҳод” маҳалла фуқаролар йиғини раиси номига ҳамкорликда “Ҳарбийлар билан учрашув” мавзусида профилактик тадбир ўтказиш юзасидан таклифнома юборилган.
Тадбир тафсилотлари акс этган видеони гуруҳ тарбиячиси тарбияланувчилар ота-оналарини жамлаган Telegram гуруҳига ташлаб берган. “Афсуски, айрим ота-оналар томонидан бу видео лавҳа бошқа гуруҳларга ташланиб, томошабинлар томонидан нотўғри талқин қилинганлиги ачинарлидир”, — дейилади хабарда.
Шавкат Мирзиёев 28 июль куни ИИВ кенгайтирилган ҳайъат йиғилишида боғча болаларига маъруза ўқиган инспекторларни танқид қилди.
“Нима иш қилиш кераклигини билмаган айрим профилактика инспекторлари эса боғчаларга бориб, 3-4 ёшли болакайларга ‘оқ-қорани фарқлаш’ бўйича маъруза ўқиш билан банд. Тизимда стажи 3 йилгача бўлган, энди тажриба тўплаётган профилактика инспекторларини криминоген оғир маҳаллага қўйиш амалиёти ҳалигача давом этмоқда. Аксинча, ‘яхши’ маҳаллаларда эса кўп йиллик тажрибаси бор ходимлар хизмат қилмоқда”, — деди президент.
Изоҳ (0)