Ўзбекистон элчихонаси вакиллари Ҳиндистондаги Сарводая Healthcare кўп тармоқли шифохонасининг Онкология институти директори Динеш Пендхаркар билан учрашди, деб хабар беради “Дунё” агентлиги.
Қайд этилишича, Онкология институти директори ўзбекистонлик шифокорлар билан кўп йиллик яқин ҳамкорликни янада ривождантириш, ҳудудларда онкология йўналишидаги масалаларга ечим топишга кўмак бериш, шунингдек, мамлакатда тиббиёт соҳасидаги ислоҳотларга ҳисса қўшиш мақсадида эканини билдирган.
Томонлар Ўзбекистон шифокорлари учун Сарводая Healthcare шифохонасининг Онкология институти негизида малака ошириш курсларини ташкил этиш истиқболларини муҳокама қилган. Дастлабки босқичда Наманган, Қашқадарё ва Хоразм вилоятлари онколог мутахассисларини бир ой муддатга Ҳиндистонга таклиф этиш имкониятлари ўрганилган.
Мазкур амалиёт мунтазамлик асосида давом эттирилиб, ҳар ойда 8-10 нафар ўзбекистонлик тиббиёт ходимларини институтда ҳиндистонлик ҳамкасблари билан тажриба алмашиши, соҳадаги сўнгги илмий ютуқлар билан яқиндан танишиши учун шароит яратилиши юзасидан келишувга эришилган.
2023 йил январь ойидаги маълумотларга кўра, Ўзбекистонда 113 минг нафар бемор онкологик касаллик билан рўйхатда турибди. Соғлиқни сақлаш вазирининг қайд этишича, бу касалликка қарши курашиш учун Хоразм вилоятида онкология диспансери ташкил этилган.
Изоҳ (0)