“Тошкент метрополитени” ДУК томонидан 2023 йилнинг 1-ярим йиллигида умумий ҳисобда 81 миллион 281 мингдан ортиқ йўловчига хизмат кўрсатилган. Бу ҳақда Транспорт вазирлиги матбуот хизмати хабар берди.
Қайд этилишича, бугунги кунда Тошкент метрополитени тармоғи 66,74 километрга, бекатлари сони эса 48 тага етган.
Ерусти метроси қурилишининг иккинчи босқичи тўлиқ якунланиши билан Тошкент метрополитенининг узунлиги 70 километрдан ортади, бекатлар сони эса 50 та бўлади.
Июль ўрталарида Тошкент метросида 2016 йилда кунига 160 минг йўловчи ташилган бўлса, ҳозирда бу рақам 620-630 мингга етгани тўғрисида хабар берилганди. “Тошкент метрополитени ишга тушганидан буён ўтган 46 йил давомида йўналишлари биттадан тўрттага ортди. Узунлиги 12,3 километрдан 67,2 километрга етди. Бекатлари сони 9 тадан 48 тага ошди. Бекатларнинг 31 таси ер остида ва 17 таси ер устида жойлашган”, — дейилганди хабарда.
2021 йил январь ойида Шавкат Мирзиёев Тошкент метросидаги йўловчилар оқимини кунига 500 минг кишидан 1 миллионга етказиш мақсадини қўйганди. “Бошлаганимизда, кунига 120-130 минг киши эди. 2020 йилга қадар 250 минг эди. Умуман олганда, мақсадим — 1 миллион. Агарда бунга эришсак, ана шунда ҳаво ростдан тозланади, одамлар ўзгаради. Ҳозирги таҳлилларга кўра, 500 минг киши чиқяпти. Бу мени қаноатлантирмайди”, — деган давлат раҳбари.
Тошкент метрополитенидан 2021 йилда қарийб 102 миллион йўловчи, 2022 йил 9 ой якунларига кўра 94 миллион 418,3 минг йўловчи ташилган эди.
Изоҳ (0)