“Toshkent metropoliteni” DUK tomonidan 2023-yilning 1-yarim yilligida umumiy hisobda 81 million 281 mingdan ortiq yo‘lovchiga xizmat ko‘rsatilgan. Bu haqda Transport vazirligi matbuot xizmati xabar berdi.
Qayd etilishicha, bugungi kunda Toshkent metropoliteni tarmog‘i 66,74 kilometrga, bekatlari soni esa 48 taga yetgan.
Yerusti metrosi qurilishining ikkinchi bosqichi to‘liq yakunlanishi bilan Toshkent metropolitenining uzunligi 70 kilometrdan ortadi, bekatlar soni esa 50 ta bo‘ladi.
Iyul o‘rtalarida Toshkent metrosida 2016-yilda kuniga 160 ming yo‘lovchi tashilgan bo‘lsa, hozirda bu raqam 620-630 mingga yetgani to‘g‘risida xabar berilgandi. “Toshkent metropoliteni ishga tushganidan buyon o‘tgan 46 yil davomida yo‘nalishlari bittadan to‘rttaga ortdi. Uzunligi 12,3 kilometrdan 67,2 kilometrga yetdi. Bekatlari soni 9 tadan 48 taga oshdi. Bekatlarning 31 tasi yer ostida va 17 tasi yer ustida joylashgan”, — deyilgandi xabarda.
2021-yil yanvar oyida Shavkat Mirziyoyev Toshkent metrosidagi yo‘lovchilar oqimini kuniga 500 ming kishidan 1 millionga yetkazish maqsadini qo‘ygandi. “Boshlaganimizda, kuniga 120-130 ming kishi edi. 2020-yilga qadar 250 ming edi. Umuman olganda, maqsadim — 1 million. Agarda bunga erishsak, ana shunda havo rostdan tozlanadi, odamlar o‘zgaradi. Hozirgi tahlillarga ko‘ra, 500 ming kishi chiqyapti. Bu meni qanoatlantirmaydi”, — degan davlat rahbari.
Toshkent metropolitenidan 2021-yilda qariyb 102 million yo‘lovchi, 2022-yil 9 oy yakunlariga ko‘ra 94 million 418,3 ming yo‘lovchi tashilgan edi.
Izoh (0)