Наманган вилоятида суд қарорини уч ойга кечиктириб бериш эвазига пул сўраган сохта адвокат қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 19 июль куни Норин туманида яшовчи фуқаро ДХХ Наманган вилояти бошқармаси ва вилоят ИИБ бошлиғи номига ариза билан мурожаат қилган. У ўз аризасида шу туманда яшовчи шахс фуқаролик ишлари бўйича Учқўрғон туман судига ёзган аризаси юзасидан фуқарони яшаш хонадонидан мажбурий тартибда чиқариш масаласи бўйича ҳозир иш жараёнлари кўриб чиқилаётгани, ўзини адвокат деб таништирган шахс эса судьяга пора бериш орқали суднинг мажбурий тартибда уйдан чиқариш ҳақидаги қарорини 3 ой муддатга қолдириб беришни ваъда қилганини билдирган. Ушбу шахс аризачидан “ўз хизмати эвазига” 200 АҚШ доллари талаб қилган.
Мазкур ариза юзасидан ўтказилган ҳамкорликда тезкор тадбир давомида аризада номи келтирилган шахс 200 долларни олган вақтида ашёвий далиллар билан ушланган.
Ҳолат юзасидан Норин тумани ИИБ ҳузуридаги Тергов бўлинмаси томонидан Жиноят кодексининг 168-(фирибгарлик) ва 211-моддалари (пора бериш) билан жинояти иши қўзғатилган.
Терговга қадар текширув давомида ушбу шахс ҳеч қандай юридик маълумотга эга эмаслиги, ҳозирга қадар у адвокатлик фирмасида оддий ишчи сифатида фаолият юритиши маълум бўлган.
Апрель охирларида Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)