Россия президенти Владимир Путин зимбабвелик ҳамкасби Эммерсон Мнагагвага вертолёт совға қилди. Бу ҳақда Африка давлати ахборот вазирлиги хабар берди.
“Президент Путин жаноби олийлари Эммерсон Дамбузо Мнангагвага вертолёт совға қилди, у яқин орада Зимбабвега етиб келади”, — дейилади хабарда.
Россия ва Зимбабве раҳбарларининг учрашуви 27 июль, пайшанба куни Санкт-Петербургда Россия—Африка саммити доирасида бўлиб ўтган. Аввалроқ Зимбабве президенти ҳукуматни танқид қилишни тақиқлаганди.
Қонун зимбабвеликлар ўртасида ватанпарварлик туйғусини ривожлантиришга қаратилган бўлиб, бунга қарши бўлганлар учун ўлим жазосигача бўлган ҳукм назарда тутилган.
Ҳукуматни танқид қилиш ва уни ағдаришга чақириш, шунингдек, ҳарбий аралашув, иқтисодий санкциялар ва савдо бойкотлари учун мамлакат ичида ва ташқарисида митинглар ўтказиш тақиқланади.
Бундай ҳаракатлар “мамлакат суверенитети ва миллий манфаатларига қасддан зарар етказиш” сифатида баҳоланади. Ушбу жиноятларни содир этганлар фуқароликдан маҳрум этилиши, 20 йилгача қамоққа олиниши ёки ўлим жазосига ҳукм қилиниши мумкин, гарчи охирги жазо 20 йил давомида Зимбабведа қўлланилмаган.
Изоҳ (0)