Венгрия бош вазири девони раҳбари Гергей Гуяш Венгрия расмийлари Европа Иттифоқининг Украинага 20 миллиард евро миқдорида ҳарбий ёрдам кўрсатиш таклифига қарши эканини маълум қилди. Аввалроқ Венгрия ташқи ишлар вазири томонидан ҳам шундай позиция билдирилган эди.
“Биз Европа Иттифоқига аъзо бўлмаган давлатни унинг бюджетидан қўллаб-қувватлай олмаймиз”, — деди Венгрия Бош вазири девонининг раҳбари брифингда.
Гергей Гуяш Венгрия Европа Иттифоқи бюджети ва махсус жамғармалардан унга тегишли бўлган маблағнинг ажратилишини кутаётганини қўшимча қилган.
Венгрия ҳукумати сайтида бугун, 27 июль куни Гуяшнинг Будапештдаги нутқидан парча эълон қилинди. Унда сиёсатчининг Украинага ҳарбий ёрдам учун 20 миллиард евро ҳақидаги сўзлари йўқ.
Матнга кўра, девон раҳбари Европа Иттифоқидаги муҳожирлар билан боғлиқ муаммолар ва Венгрия суд тизимини мувофиқлаштириш билан боғлиқ шартларни бажарганидан сўнг Европа Иттифоқидан маблағ ажратилишини кутаётгани ҳақида гапирган. Шунингдек, Украина мавзусига ҳам тўхталиб, Венгриянинг ўт очишни тўхтатиш ва тинчлик музокаралари тарафдори эканини таъкидлаган.
20 июль куни Жосеп Боррелл Европа тинчлик жамғармаси ресурсларини кўпайтиришни таклиф қилди, бу жамғарма маблағлари Украинани ҳарбий жиҳатдан қўллаб-қувватлашга йўналтирилади. Politico нашрининг ёзишича, жамғарма 20 миллиард еврога оширилади.
Жосеп Боррелнинг таклифидан сўнг Венгрия ташқи ишлар вазири Петер Сиярто Венгрия Украинага ҳарбий ёрдам учун аввал ажратилган 10 миллиард евро бўйича Европа Иттифоқидан жавоб кутаётганини айтган.
Изоҳ (0)