24-iyul kuni ertalab Moskvaga dronlar hujum qildi. Bu haqda Moskva meri Sergey Sobyanin Telegram sahifasida ma’lum qildi.
“Bugun, ertalab soat to‘rtda ikkita noturar joy binosiga dron zarbalari qayd etildi. Jiddiy vayronagarchilik va qurbonlar yo‘q. Barcha tezkor xizmatlar voqea joyida ishlamoqda”, — dedi u.
Dronlardan biri Komsomolskiy prospektidagi binoga borib urilgan. 17-uyga zarar yetdi, deb xabar bermoqda “TASS” favqulodda xizmatlardagi manbaga tayanib.
“Dastlabki ma’lumotlarga ko‘ra, qurbonlar yo‘q”, — dedi manba. Komsomolskiy prospekti bo‘ylab yo‘nalishlardan birida transport harakati to‘sib qo‘yildi, deb xabar qildi Moskva transport departamenti.
“112” Telegram kanalining aniqlik kiritishicha, ikki qavatli uyning tomi vayron bo‘lgan, uning qarshisidagi boshqa uyda birinchi qavatdagi do‘kon oynalari va to‘rtinchi qavatdagi kvartira oynalari singan. Qo‘shni uydagi oynalarga ham zarar yetgan.
Ikkinchi dron Lixachev prospektidagi biznes markazi binosiga kelib urilgan.
“Portlash yuz berdi. Hodisa oqibatida, dastlabki maʼlumotlarga ko‘ra, jabrlanganlar yo‘q”, — deb xabar berdi “TASS” agentligiga favqulodda vaziyatlar xizmati.
O‘z navbatida Rossiya Mudofaa vazirligi Ukraina tomonidan “terrorchilik hujumi” uyushtirilgani haqida xabar berdi. Vazirlik ma’lumotlariga ko‘ra, ikkita dron elektron kurash vositalari bilan bostirilgan, hech kim jabrlanmagan.
Eslatib o‘tamiz, 30-may kuni ham Moskvaga dronlar hujumi uyushtirilgandi. Rossiya hujumda “Kiyev rejimi”ni ayblagan. Ukraina prezident ofisi rahbarining maslahatchisi Mixail Podolyak “bunga bizning bevosita aloqamiz yo‘q” deb ta’kidlagan.
Izoh (0)