Украина армиясида Россиянинг Одессадаги дон инфратузилмасига уюштираётган ҳужумларини қайтариш учун етарлича ҳаво ҳужумидан мудофаа тизимлари йўқ, деди Украина Қуролли кучларининг “Жануб” оператив қўмондонлиги матбуот котиби Наталя Гуменюк. Россия дон битимидан чиққанидан кейин Одесса портларига деярли ҳар куни зарба бермоқда.
“Бизга ракета ва ҳаво ҳужумига қарши мудофаа тизимлари керак. Кучли, замонавий ва душманнинг ҳар қандай турдаги ракетасига қарши туришга қодир воситалар керак”, — деди Гуменюк AFP агентлигига берган интервьюсида.
Гуменюк Россия армияси бир вақтнинг ўзида қанотли, гипертовушли ва кемага қарши ракеталарни учираётганини, шунинг учун ҳаво мудофаа тизимлари “бу таҳдидга қарши туролмаётганини” тушунтирди. Унинг қўшимча қилишича, Россия “ҳар сафар ўз тактикасини такомиллаштириб боряпти”.
Гуменюкнинг сўзларига кўра, ҳаво ҳужумидан мудофаа тизимларидан ташқари, украиналик ҳарбийларга мамлакат жанубига зарба бераётган Россия ҳарбий кемаларини йўқ қилиш учун Американинг F-16 қирувчи самолётлари керак.
“Икки-уч ой ичида бизда бирорта ҳам порт қолмаслиги мумкин. Россия Қора денгизда ҳукмронлик қилмоқчи. Улар дон экспортида монополияга эга бўлишни истайди. Улар Украинани дунёни боқишга қодир мамлакат сифатидаги ролидан маҳрум қилмоқчи”, — деб хулоса қилди Гуменюк ва Россия ҳарбийлари Украина портларини блокада қилишни қайта бошлаганини қўшимча қилди.
18 июлдан бери Россия Украина жанубидаги, жумладан Одессадаги порт инфратузилмаси объектларига ҳужум қилиб, буни Қрим кўпригидаги портлашга жавоб, деб атамоқда.
23 июлга ўтар кечаси Одесса маркази уруш бошланганидан бери энг кўп ўққа тутилди, бунинг оқибатида шаҳардаги энг йирик православ черкови – Преображенский кафедрал собори вайрон қилинган. Бир киши ҳалок бўлгани ва 19 киши яралангани хабар қилинган.
Россия Мудофаа вазирлиги собор Россия ҳужуми нишонига айланганини инкор этиб, бино “Украина ҳаво ҳужумидан мудофаа операторларининг нўноқ ҳаракатлари” туфайли вайрон бўлганини даъво қилмоқда.
Изоҳ (0)