АҚШ маълумотларига кўра, Россия Шимолий Кореяга қурол-яроғ эвазига озиқ-овқат таклиф қилиш учун Пхеньян га расмий делегация жўнатишни режалаштирмоқда. Бу ҳақда Пентагон матбуот котиби Жон Кирби маълум қилди. У Россия ва Шимолий Корея ўртасидаги ҳар қандай келишув, жумладан, қурол-яроғ битими Бирлашган Миллатлар Ташкилоти Хавфсизлик кенгаши резолюциясини бузишини айтди.
АҚШ аввалроқ ҳам КХДРни Россия ҳарбийлари ва “Вагнер” ёлланма аскарларини қурол-яроғ билан таъминлаганликда айблаган эди, Пхеньян эса бу айбловларни қатъиян рад этган.
Матбуот анжуманида Жон Кирби ҳозир АҚШда Москва ва Пхеньян ўртасида тузилиши мумкин бўлган келишув ҳақида янги маълумотлар борлигини айтди.
“Билишимизча, Россия Шимолий Кореяга делегация жўнатиб, уларга ўқ-дорилар эвазига озиқ-овқат таклиф қилмоқчи”, — деди у.
“АҚШ воқеалар ривожи ва таклиф қилинган келишувни диққат билан кузатиб бормоқда”, — қўшимча қилди Кирби.
30 март куни АҚШ Молия вазирлиги Москва ва Пхеньян ўртасидаги музокараларда воситачилик қилган Словакия фуқароси Ашот Мкртичевни қора рўйхатга киритган эди. Вазирлик вакилларининг таъкидлашича, Мкртичев шу вақтгача бир қатор битимлар ва савдоларни ташкиллаштирган, бу эса Шимолий Кореяга 2022 йил охири — 2023 йил бошида валюта, фуқаролик самолётлари, товарлар ва хом ашё эвазига Россияга қурол жўнатиш имконини берган.
Изоҳ (0)