Украина Қуролли кучларининг қуруқликдаги қўшинлари “Жануб” оператив қўмондонлиги вакили Наталя Гуменюкнинг маълум қилишича, рус қўшинлари Украинага охирги ҳужумлар чоғида Россия ҳудудида йиғилган Shahed камикадзе-дронларидан фойдаланган. Дронлардаги белгилар шундан далолат беради, дейди у.
“Сўнгги ҳужумлардан сўнг топилган Shahed бўлакларида кирилл алифбосидаги белгилар мавжуд, бу уларнинг аллақачон Россияда ишлаб чиқарилаётганини кўрсатади”, — деди Гуменюк Украина телевидениесида.
Эроннинг Россияда йиғилган илғор Shahed дронларидан Украинага зарба беришда фойдаланилаётгани ҳақида 20 июль куни Defence Express украин нашри ҳам хабар берганди. Нашрнинг ёзишича, бу дронлардаги жанговар каллакларга лотин ўрнига кирилл алифбосида ёзилган.
Хабарларга кўра, Эроннинг Shahed камикадзе дронларини йиғиш Татаристондаги “Алабуга” махсус иқтисодий зонаси ҳудудида амалга оширилмоқда. Маҳаллий журналистлар томонидан олиб борилган суриштирув натижаларига кўра, 15-16 ёшли коллеж ўқувчилари Эрон компонентларидан жанговар дронларни йиғишда мажбурий қатнашмоқда.
Маълумот учун, Эрон Россияга дрон етказиб беради, улардан Украинага қарши урушда фаол фойдаланилмоқда. Хусусан, АҚШ маълумотларига кўра, 2022 йил августидан 2023 йилнинг майигача Россия Эрондан 400 дан ортиқ, асосан, Shahed типидаги дронларни қабул қилиб олган ва уларнинг аксариятидан Украинанинг муҳим инфратузилмасига зарба беришда фойдаланган.
Россия ўз ҳудудида Эрон дронларини ишлаб чиқаришни режалаштираётгани ҳақида The Washington Post газетаси кузда хабар берганди. Нашрнинг ёзишича, Россия ва Эрон расмийлари ишлаб чиқариш бўйича 2022 йил ноябрь ойи бошида келишувга эришган.
2023 йил февралида Россия ва Эрон Татаристонда Shahed-136 камикадзе дронларини ишлаб чиқарувчи завод қуриши ҳақида хабар берилди.
Изоҳ (0)