Россияда 1 сентябрдан мактаб ўқувчилари дронлардан жанговар фойдаланиш асосларини ўрганишни бошлайди. Машғулотлар дастлабки ҳарбий тайёргарлик курси доирасида ўтказилади. Бу ҳақда Федерация кенгаши ҳузуридаги Рақамли иқтисодиётни ривожлантириш кенгаши раиси ўринбосари Артём Шейкин “РИА Новости”га берган интервьюсида маълум қилди.
Шейкиннинг сўзларига кўра, тегишли таклиф “Федерация кенгаши ҳузуридаги Рақамли иқтисодиётни ривожлантириш бўйича кенгаш бўлимида ишлаб чиқилган ва Россия мудофаа вазирига юборилган”.
“Таклиф кўриб чиқилди ва қўллаб-қувватланди, жумладан, Таълим вазирлиги томонидан ҳам”, — деди у.
Сенатор “РИА Новости”га кўрсатган Россия Мудофаа вазирлигининг жавобида айтилишича, дастур “дрон турлари, мақсади, ишлаш хусусиятлари ва умумий тузилишини ўрганиш, ҳудудни разведка қилиш ва душман дронларига қарши курашиш усулларини” ўз ичига олади.
Россия Таълим вазирлиги дастурни тасдиқлаган
“Дастур Россия Таълим вазирлиги томонидан тасдиқланган ва жорий йилнинг сентябрь ойидан бошлаб ‘Авангард’ ёшларни ҳарбий-ватанпарварлик руҳида тарбиялаш бўйича таълим ташкилотлари ва ўқув-методик марказларида жорий этилиши режалаштирилган”, — дейилади ҳужжатда.
Апрель ойи охирида Россия президенти Владимир Путин мактабларда дронларни бошқариш курсларини жорий этишга чақирганди. Июнь ойи бошида “Важние истории” нашри Россия мактаблари болаларга дронларни қандай бошқаришни ўргатиш учун ўқув дронлари ва бошқа жиҳозларни харид қила бошлагани ҳақида ёзди. Давлат харидлари веб-сайтидан нашр Санкт-Петербург, Калининград, Ёқутистон ва Сахалинск мактабларидан бундай жиҳозларни сотиб олиш учун аризалар топширилганини аниқлашга муваффақ бўлди.
Изоҳ (0)