“Дарё”нинг YouTube’даги каналида ҳуқуқшунос ва ижодкор Отабек Маҳкамов билан суҳбат ташкил этилди. У суҳбат давомида онасининг оғир дарддан вафот этгани, АҚШдаги ҳаёти қийинчилик билан бошлангани ва мусофирчиликда қандай ҳақиқатларни англагани ҳақида сўзлаб берди.
— Онам Раъно Маҳкамова 49 ёшида саратон касаллиги сабаб вафот этган. Қийин аҳволдалигимизда оиламизга ҳеч қандай ёрдам берилгани йўқ. Албатта, одамнинг қанча яшаши Аллоҳдан, аммо умрининг узайишига қайсидир одамлар сабабчи бўлиши мумкин. Ҳатто, жон бераётган инсонга ҳам яхши шароитда жон беришига ёрдам бериш керак.
У пайтда 23 ёшда эдим, мактабда оддий ўқитувчи бўлиб ишлардим. Ойлик даромадим ҳам ҳаминқадар бўлгани учун моддий томонлама жуда қийин вазиятга тушганман. Бундан ташқари, шифокорларнинг билимсизлиги, бефаросат ва қўпол муомаласидан жуда ранжиганман. Уч ой мобайнида касалхона ҳовлисида яшаганман, шунда бу соҳадаги муаммоларни ўз кўзим билан кўрганман. Сўнгги вақтга қадар онамнинг соғайиб кетишига умид қилганман. Чунки онам ўз оёғи билан касалхонага борганди. Афсуски, онамнинг ўлими оиламизга оғир зарба бўлди. Ўшандаёқ саратон ва оққон билан оғриган бемор болаларга ёрдам беришни ният қилгандим. Ҳозирги кунда халқаро миқёсда хайрия тадбирларини ўтказиб, Ўзбекистондаги болаларни даволашга кўмаклашамиз, — дейди Отабек Маҳкамов.
Отабек Маҳкамов илк марта АҚШга борганида қандай қийинчиликларга учрагани ҳақида сўзлаб берди.
— 2015 йили ўқиш учун АҚШга борганман. Ўзбекистонда ишим, ўзимга яраша даромадим бор эди. Адвокатликдан ташқари, фильм ва клипларга ҳам таклиф этиб туришарди. АҚШда ҳамма қатори мен ҳам бирдан яхши ишга жойлашолмаганман. Пулим бор эди, аммо ҳамиша онамнинг “Захира пулинг бўлиши керак”, деган гапига амал қилиб, кунига фақатгина бир маҳал овқатланардим. Бир куни дўконга кириб, ярим тайёр лапша маҳсулотини харид қилаётганимда ортимдан бир ўзбек йигити келиб, танишини айтган. Албатта, АҚШда мени кимдир таниши ёқимли ҳолат. “Ака, нега бунақа арзон лапшаларни еяпсиз. Менинг ҳам бошимдан ўтган, сизга ёрдам бераман”, деб икки-уч халта озиқ-овқат харид қилиб берган. Олишни истамаганман, аммо “Чин кўнгилдан, сизни фильмларингизни кўриб катта бўлганман”, деган гап-сўзларига ишонганман. Хуллас, эртаси куни ўқишдан чиқсам учдан ортиқ дўстим қўнғироқ қилган, хабар йўллаган. Охирги қўнғироқ қилган дўстим билан боғлансам “Қийналиб қолганингни нега бизга айтмадинг”, деб қолди. Ҳайрон бўлиб сабабини сўрасам кеча менга ёрдам берган йигит “Отабек Маҳкамов АҚШда қийналиб қолибди, арзон лапша еб юрган экан, рўзғорлик қилиб бердим”, деб гап тарқатибди. Бу гап албатта, ғуруримга тегди. Бунинг устига ундан ёрдам сўрамагандим-ку, деб ўз-ўзимни койидим. Мана шу воқеадан кейин текин пишлоқ фақатгина қопқонда бўлишини англаб етдим, — дейди Отабек Маҳкамов.
Отабек Маҳкамов билан тўлиқ интервьюни қуйида томоша қилинг:
Изоҳ (0)