Норвегияда сўлчи партия раҳбари кўзойнак ўғирлагани учун истеъфога чиқди

Норвегиядаги радикал сўлчи Родт (“Қизиллар”) партияси етакчиси Борнар Мокснес Hugo Boss брендидаги қуёшдан ҳимоя қилувчи кўзойнакни ўғирлаб, қўлга тушганидан кейин истеъфога чиқди, деб хабар бермоқда Politico.

Нашрнинг ёзишича, Мокснес кўзойнакни 16 июль куни Осло аэропорти дўконидан ўғирлаган. Воқеа видеокузатув камераларига тушиб қолган, ўғирлик видеоси тезда интернетда тарқалган. Мокснес дастлаб касаллик таътилига чиқди, 24 июль куни эса истеъфога чиқишини эълон қилди.

“Кўпчилик мендан қандай қилиб бундай аҳмоқлик қилганимни сўради. Сўнгги ҳафталарда ўзимга бу ҳақда кўп савол бердим. Менда адекват тушунтириш йўқ”, — деб ёзди у Facebook’да.

Мокснеснинг қўшимча қилишича, у партияга аъзолигини ва депутатлик лавозимини сақлаб қолиш ниятида.

Родт — радикал сўл социалистик партия. У мамлакатда мулкий тенгсизликни камайтиришни ўз мақсадларидан бири, деб эълон қилган. Партия Норвегия парламентида саккизта ўринга эга. Борнар Мокснес Родтни 11 йил бошқарган.

Аввалроқ Янги Зеландия адлия вазири маст ҳолатда рулга ўтириб, йўл транспорт ҳодисасини содир этганидан кейин истеъфога чиққанди.