Нидерландия бош вазири Марк Рютте бошчилигидаги ҳукумат истеъфога чиқди. Ҳукумат раҳбари эрта-индин қиролга расмий ариза билан мурожаат қилишини айтди.
Рютте, шунингдек, ўзи 2006 йилдан буён бошқариб келаётган Озодлик ва демократия учун халқ партияси (VVD) раҳбари сифатида қолиш-қолмаслигини ўйлаб кўришини таъкидлади.
Аввалроқ Нидерландияда ҳукмрон ўнг марказчилар коалицияси парчаланган эди, бунга мамлакатда қочқинларга бошпана бериш сиёсати бўйича келиша олмаслик сабаб бўлган. Охирги бир неча ҳафта мобайнида коалиция Нидерландияга келаётган қочқинлар ва уларнинг қариндошлари оқимини қандай камайтиришни муҳокама қилмоқда, чунки улар учун етарли жой йўқ.
Рютте бошчилигидаги VVD партияси айрим қочқинлар, шу жумладан уруш зонасини тарк этганлар учун оиласи билан бирлашишни чеклаш ҳақида таклиф киритган ва буни қўллаб-қувватлашни талаб қилган.
Ноябрь ойида парламент сайловлари ўтказилиши кутилмоқда. Амалдаги Вазирлар Маҳкамаси янги ҳукумат тузилмагунча ўз фаолиятини давом эттиради.
Марк Рютте 56 ёшда. У 2010 йил октябрь ойидан буён Нидерландия ҳукумати раҳбари.
Изоҳ (0)