Yangi Zelandiya adliya vaziri yo‘l transport hodisasini sodir etganidan keyin iste’foga chiqdi. U hibsga olinishda qarshilik ko‘rsatgan, deb yozadi The Guardian.
Yangi Zelandiya bosh vaziri Kris Xipkinsning so‘zlariga ko‘ra, Kiri Allan xonim Vellingtonda avariyaga uchragan, u qo‘lga olingan va to‘rt soatdan keyin politsiya mahkamasidan qo‘yib yuborilgan.
Politsiya uni mashinani ehtiyotsizlik bilan boshqarish, shuningdek, politsiyachiga qarshilik ko‘rsatganlikda aybladi. Tibbiy ko‘rik davomida vazir mast holatda ekani aniqlandi.
Bir vaqtlar Leyboristlar partiyasida portlayotgan yulduzdek ko‘rilgan Allan yaqinda jufti bilan ajrashgani va hamkasblari bilan yomon munosabatda bo‘layotgani ortidan ruhiy salomatlik uchun ta’tilga chiqqandi.
Hozircha Kiri Allan parlament a’zosi bo‘lib qolmoqda. U qilmishidan afsusda ekanini va siyosatda qolish-qolmaslik haqida o‘ylash uchun uyiga qaytishini aytdi.
“Oxirgi haftalarda bir qator shaxsiy qiyinchiliklarga duch keldim. Bu muammolarni hal qilish uchun ta’til oldim, ular va vazir sifatidagi ishimni muvozanatda saqlay olaman deb o‘ylagandim. Kechagi xatti-harakatlarim menda hammasi joyida emasligini ko‘rsatdi, o‘zim va hamkasblarimni tashvishga qo‘ydim”, — dedi u.
Kiri Allan hodisasi milliy saylovlarga uch oydan kamroq vaqt qolganda Yangi Zelandiya hukumati vazirlari bilan bog‘liq qator qo‘pol xatolar va janjallardan biri hisoblanadi. Bunga qadar bir qator vazirlar iste’foga chiqqan yoki ishdan bo‘shatilgan. Bosh vazir Kris Xipkins yanvar oyida Jasinda Ardern iste’foga chiqqanidan so‘ng ushbu lavozimni egallagan edi.
Yangi Zelandiyada milliy saylovlar 14-oktabr kuni bo‘lib o‘tadi.
Izoh (0)