Samarqand viloyatining Oqdaryo tumanidagi ikkita qabristonda yong‘in sodir bo‘ldi. Bu haqda “Daryo”ga ma’lum qilgan murojaatchilar taklifiga ko‘ra, tahririyat muxbiri Farhod Norbo‘tayev voqeani o‘rganish uchun aytilgan manzilga bordi.
Ma’lum bo‘lishicha, yong‘in 2020-yil 3-noyabr kuni tumanning Oytamg‘ali mahallasidagi “Sulton” hamda “Primkent” mahallasidagi “O‘tarchi” qabristonida sodir bo‘lgan. Natijada 7 gektar yer maydoniga ega bo‘lgan ikkala qabristonning katta qismi alanga ichida qolgan.
2017-yildan buyon “Sulton” qabristonida qorovul vazifasida ishlab kelayotgan Navro‘z O‘roqovning ma’lum qilishicha, yong‘in qo‘shni qabristondan boshlangan. Bu paytda ular qabristonda obodonlashtirish ishlarini olib borayotgan bo‘lgan. U qabristonning bir gektardan ortiq yer maydonining yonishiga sabab bo‘lgan olovni kim yoqqanligini ko‘rmagan.
“Bizlar tushlik qilishga ketganimizda to‘satdan yong‘in kelib chiqqan. Qo‘shni qabristonning qorovuli qo‘ng‘iroq qilib, qabristonda yong‘in bo‘layotganini aytib, meni chaqirdi. Uchta o‘g‘lim bilan kelib, olovni o‘chirishga urindik, ammo o‘chira olmadik. Yong‘in xavfsizligi xodimlarini chaqirganimiz bilan ular qabristonga kira olmaydi. Qabrlarning ustidan yurolmaydi. Shuning uchun mahalla raisiga qo‘ng‘iroq qildim. Olov qo‘shni qabriston tomondan ikkinchi tomonga o‘tib keldi. Olovni to‘xtata olmaganimiz uchun ikkinchi qabristonga ham o‘tdi. Qabriston ikkiga bo‘lingan. Shamol bizning qabriston tomonga esayotgani uchun olov alanga olib, biz tomonga o‘tdi”, — deydi “Sulton” qabristoni qorovuli Navro‘z O‘roqov.
“O‘tarchi” qabristoni qorovuli Normuhammad Soliyevning aytishicha, yong‘in 3-noyabr kuni soat taxminan 13:00 atrofida sodir bo‘lgan. Uning taxmin qilishicha, qo‘shni qishloqda mol boqadigan yosh bolalar o‘yinqaroqlik qilib yoki kartoshka pishiraman deb tasodifan yoqib yuborgan bo‘lishi ham mumkin.
“Soat 12:30 atrofida men tushlik qilish uchun uyga keldim. Uyga kelganimda Ishtixon tumanidan o‘g‘lim qo‘ng‘iroq qilib, qabristondan tutun chiqayotganini aytdi. Borsam o‘n metr joyi yongan ekan. O‘chirib ulgurmadim. Qo‘shni qabriston qorovuliga ham qo‘ng‘iroq qildim. U ham keldi. Ikkalamiz ham olovni o‘chirishga ulgurmadik. Yong‘in nima sababdan kelib chiqqanini bilmayman. Bizlar yantoqni o‘rib, chuqurga uygan edik. Yong‘in bir-bir yarim soatlar davom etdi. O‘chirish uchun ko‘p harakat qildik. Ammo iloji bo‘lmadi”, — deydi Normuhammad Soliyev.
“Primkent” mahallasi oqsoqoli Asliddin Abdurahimovning ta’kidlashicha, qabristonning bir gektar yeri yongan.
“Haqiqatan ham achinarli holat bo‘lgan. Bu yerda ko‘p insonlar yotibdi. Bu bizning ham aybimiz. Boricha tushuntirish ishlari olib borib, qorovullarni ogohlantirdik. Obodonlashtirish tashkilotiga xat bilan chiqdik. Bu bo‘yicha chora tadbirlarni ko‘ramiz. Iloji boricha hashar yo‘li bilan tozalaymiz”, — deydi “Primkent” mahallasi oqsoqoli Asliddin Abdurahimov.
Oqdaryo tuman ekologiya va atrof muhitni muhofaza qilish inspeksiyasi boshlig‘i Jonibek O‘roqov qabristonga olov qo‘ygan shaxsni aniqlash va uni topish maqsadida tuman Ichki ishlar bo‘limiga murojaat qilganligini bildirdi.
“Ikki kun avval bizga tumanimizdagi Oytamg‘ali qishlog‘ida qabriston yonib ketganligi haqida xabar keldi. Haqiqatan kelib, holatni o‘rgandik. Qabriston juda katta. Ikkita qishloqning qabristoni. Qorovuli ham ikkita. Tuman IIBga murojaat qilganmiz. Ular qidiruv ishlarini olib borishmoqda. Hozirgi kunda ikkita qorovul ham jarimaga tortilgan”, — deydi Jonibek O‘roqov.
Samarqand viloyat ekologiya va atrof-muhitni muhofaza qilish boshqarmasi axborot xizmatining ma’lum qilishicha, “Primkent” MFY hududida joylashgan “O‘tarchi” qishloq qabristoni fuqarolar S.N. va O‘.N.ning hududdagi o‘simlik qoldiqlarini yoqib yuborishi oqibatida kelib chiqqan bo‘lib, ular “Tabiatni muhofaza qilish to‘g‘risida”gi qonunning 20-moddasi, “Atmosfera havosini muhofaza qilish to‘g‘risida”gi qonunning 4-moddasi talablarini qo‘pol ravishda buzgan. Mazkur holat yuzasidan huquqbuzarlarga nisbatan Ma’muriy javobgarlik to‘g‘risidagi kodeksning 88-moddasi 3-qismi (dala va aholi punktlarida ang‘iz, xazon va shox-shabbalarni yoki o‘simliklarning boshqa qoldiqlarini yoqib yuborish orqali atmosfera havosini zararli moddalar bilan ifloslantirish)ga muvofiq ma’muriy bayonnoma rasmiylashtirilib, jarima qo‘llanilgan. Shuningdek, mahalla oqsoqollari ishtirokida tushuntirish ishlari olib borilib, ogohlantirishlar berilgan.
Izoh (0)