Фарғона вилояти Риштон туманида олий ўқув юртига жойлаштиришни ваъда қилиб, 3 минг доллар пулларини қўлга киритган шахсга жиноят иши қўзғатилди. Бу ҳақда вилоят ИИБ ахборот хизмати хабар берди.
Маълум қилинишича, 2023 йилнинг июнь ойида Қ.Р. таниши Т.Н. исмли аёл ишончига кириб, ўқишини Ўш вилоятида жойлашган олий таълим муассасасидан Ўзбекистонда жойлашган олий ўқув юртларидан бирига ўзининг танишлари орқали ўтказиб қўйишни ваъда қилган. У ўз хизмати эвазига 3 минг АҚШ долларини фирибгарлик йўли билан қўлга киритган.
Мазкур ҳолат юзасидан Риштон тумани ИИБ ҳузуридаги тергов бўлинмаси томонидан Жиноят кодексининг 168-моддаси 2-қисми “а” банди (фирибгарлик) билан жиноят иши қўзғатилган. Мазкур жиноятни содир этган шахс беш йилгача озодликдан маҳрум қилиш билан жазоланиши мумкин.
Январь ойида Бош прокуратура ҳузуридаги департамент Бухоро ва Фарғона вилоятларида ўқишни кўчириб бериш билан фирибгарлик ҳолатларига чек қўйганди. Куни кеча эса Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушгани тўғрисида хабар берилди.
Ўқишни кўчириш тартиби
Вазирлар Маҳкамасининг 2017 йилдаги 393-сон қарорига мувофиқ, 15 июлдан ОТМларда ўқишни кўчириш жараёнлари бошланган.
Ўқишни кўчириш учун аризалар 5 августга қадар қуйидаги иккита платформа орқали қабул қилинади:
- “Transfer.edu.uz” — давлат ОТМнинг биридан бошқасига;
- “My.uzbmb.uz” — хорижий мамлакатларда ёки республикада фаолият юритаётган хорижий ва нодавлат ОТМдан давлат ОТМларига.
Изоҳ (0)