ДХХ Олий таълим муассасаларига ўқишга киритиб қўйишини айтиб фирибгарлик қилган бир неча шахсларни қўлга олди.
Қувасой шаҳридаги махсус мактаб-интернати ходими муқаддам фирибгарлик билан боғлиқ жинояти учун судланган, Фарғона давлат университети талабаси билан ўзаро тил бириктириб, маҳаллий фуқарони мазкур олий таълим муассасасининг “Бошланғич таълим ва спорт-тарбиявий иши” йўналишига ўқишга киритиб қўйиш эвазига 3 400 АҚШ доллари талаб қилган.
ДХХнинг Фарғона вилояти бўйича бошқармаси ходимлари томонидан Иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказилган тезкор тадбирда, махсус мактаб-интернати ходими сўралган пулни олган вақтида ашёвий далиллар билан ушланган.
Бувайда туманида кузатилган ҳолатда эса умумий ўрта таълим мактаби ўқитувчиси юқори лавозимда ишловчи танишлари орқали, Риштон туманида яшовчи фуқаронинг Қирғизистон олий ўқув юртидаги ўқишини Андижон давлат тиббиёт институтига кўчириб бериш эвазига 8 минг АҚШ доллари талаб қилиб, олдиндан 1500 доллар олган вақтида ушланган.
ДХХнинг Тошкент шаҳар бўйича бошқармаси ходимлари томонидан Бош прокуратура ҳузуридаги департаментнинг шаҳар бошқармаси ходимлари билан ҳамкорликда ўтказилган тезкор тадбирда, Ўзбекистон Миллий университети талабаси мансабдор танишлари орқали, Нурафшон шаҳрида яшовчи фуқарони Тошкент давлат иқтисодиёт университетига ўқишга киритиб қўйиш эвазига 7 500 АҚШ доллари талаб қилиб, олдиндан 4 000 доллар олган вақтида ашёвий далиллар билан ушланган.
Бошқа бир ҳолатда эса Бухоро инновациялар университети ходими маҳаллий фуқарони алдов йўли билан ишончига кириб, уни Қирғизистондаги олий ўқув юртида ўқиётганлиги тўғрисида сохта ҳужжатлар тайёрлаб, гўёки кўчириш йўли билан Бухоро шаҳридаги Осиё халқаро университетига ўқишга киритиб қўйиш эвазига 26 миллион сўм талаб қилади ва олдиндан 500 доллар ва 14 миллион 400 минг сўм олган вақтида ушланган.
Бу йўналишда ДХХнинг Сирдарё вилояти бўйича бошқармаси ходимлари ҳам вилоят ички ишлар бошқармаси ходимлари билан ҳамкорликда ўтказилган тезкор тадбирда, Бухоро вилоятининг Шофиркон туманида яшовчи, 1997 йилда туғилган шахс Гулистон шаҳрида истиқомат қилувчи фуқаронинг ишончига кириб, танишлари ёрдамида уни Гулистон давлат университетининг “Ижтимоий-иқтисодий” факультетига ўқишга киритиб қўйиш эвазига 4 500 доллар олган вақтида ашёвий далиллар билан ушланган.
Изоҳ (0)