Олий Мажлис Қонунчилик палатаси биноси ёнидаги тартибга солинмаган пиёдалар ўтиш йўлида йўл-транспорт ҳодисаси содир бўлди. Бу ҳақда ИИВ ЙҲХХ ахборот хизмати хабар берди.
Маълум қилинишича, 21 июль куни соат 19:00 ларда Чилонзор тумани Бунёдкор шоҳ кўчасида ҳайдовчи Lacetti русумли автомашинасини бошқариб келаётиб, ўзидан олдинда кетаётган Damas русумли автомашинаси билан тўқнашув содир этган.
Тўқнашув зарбидан сўнг Damas автомашинаси тартибга солинмаган пиёдалар ўтиш жойида йўлни кесиб ўтаётган пиёдани уриб юборган. ЙТҲ натижасида тан жароҳат олиб шифохонага ётқизилганлар ҳақида маълумот келиб тушмаган.
Ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
“Ҳайдовчилардан автомашина бошқариш давомида тартибга солинмаган пиёдалар ўтиш жойларига яқинлашганда тезликни пасайтиришларини ва пиёдаларга тўхтаб йўл бериб, ўтказиб юборишларини, оралиқ масофа сақлаб ҳаракатланишларини сўраб қоламиз”, — дейилади хабарда.
Россиялик таниқли урбанист Аркадий Гершман 2022 йил апрелида Олий Мажлис қонунчилик палатаси ёнидаги ушбу йўлни танқид қилганди. “Тошкент марказидаги пиёдалар ўтиш йўли. Бу ерда тахминан 20 та полоса бор: асосийси 4+4 ва қўшимча 5+3+3. Табиийки, светофор йўқ. Эътибор берилса, ҳайдовчилар одамларни ўтказиб юборишда ‘аварийка’ни ёқаётганини кўриш мумкин — бу қизиқарли маҳаллий одатга айланган”, — деб ёзганди у.
Шунингдек, мутахассис Тошкентда ўтказилган матбуот анжуманида тартибга солинмаган пиёдалар ўтиш жойи — улар фақат битта чизиқли ҳаракатда қўлланиши мумкинлиги, икки ва ундан ортиқ чизиқли йўлларда светофорлар бўлиши шартлигини айтганди.
Изоҳ (0)