Товламачилик ва фирибгарликда айбланаётган Абдуқодир Мўминовдан жабрланганлар сони маълум қилинди

Абдуқодир Мўминов иши бўйича суд мажлиси 25 июлда бошланади. Бу ҳақда Олий суд ахборот хизмати раҳбари Азиз Абидов хабар берди.

Маълум қилинишича, унга доир жиноят иши жиноят ишини кўриб чиқиш Миробод туман судининг иш юритувига келиб тушган бўлиб, суд жараёни С. Содиқов раислигида 25 июль куни соат 15.00 да бошланади.

YouTube платформасидаги “Кўзгу” саҳифаси муаллифи, блогер Абдуқодир Мўминов Жиноят кодексининг 141-1-моддаси (шахсий ҳаёт дахлсизлигини бузиш) 2-қисми “а”, “б” бандлари, 165-моддаси (товламачилик) 3-қисми “а” банди, 168-моддаси (фирибгарлик) 3-қисми “б”, “в” бандлари, 4-қисми “а” банди, 189-моддаси (савдо ёки хизмат кўрсатиш қоидаларини бузиш) 1-қисми ва 28,211-моддаси (пора беришда иштирокчилик) 3-қисми “а” бандида назарда тутилган жиноятларни содир этганликда айбланмоқда.

Тасдиқланган айблов хулосасига кўра мазкур жиноят иши бўйича 14 нафар жабрланувчи мавжуд бўлиб, жиноят оқибатида уларга жами 903 421 567,5 сўм миқдорида моддий зарар етказилгани аниқланган.