“Дарё”да Олий суд маълумоти асосида маст ҳолда транспорт бошқариш бўйича энг кўп ҳолатлар Самарқанд вилоятида қайд этилгани ҳақида хабар эълон қилинганди. Самарқанд вилоят ИИБ ахборот хизмати раҳбари Жаҳонгир Сагдуллаев мазкур ҳолатга муносабат билдириб, вилоятда маст ҳайдовчиларнинг кўплигини изоҳлади.
“Тўғри, статистика бу — факт. Бироқ иккинчи жиҳати ҳам бор. Республикада автомашиналар сони, аҳоли сони энг кўп ҳудуд Самарқанд. Пойтахтдан кейин иккинчи ўринда туради. Бироқ, бу асосий ва муҳим омил эмас. Самарқандда ҳар куни маст ҳайдовчиларни аниқлаш бўйича шиддатли рейдлар бўлади. Бошқарма бошлиғи Раҳматжон Тошназарович топшириғига асосан ЙҲХБ мастларни аниқлаш бўйича қаттиқ ишланади. Шунингдек, Самарқанд чорраҳадаги цивилизация маркази ҳисобланади. Кўпчилик дам олишга келиб, туннинг иккинчи ярмигача ўтириб, спиртли ичимликлар ичиб, афсуски автомобиль бошқарувига ўтиради”, — дейди Жаҳонгир Сагдуллаев бунга изоҳ берар экан.
Масъулнинг ёзишича, вилоятдаги айрим фуқароларда масъулият ва жавобгарлик ҳиссининг пастлиги ҳам бу статисикада вилоят пешқадам эканлигига сабаб бўлади.
“Бунга сабаблардан яна бири айрим фуқароларда масъулият ва жавобгарлик ҳиссининг пастлиги ҳамдир. Нафақат оддий фуқаролар, балки давлат идоралари хизматчилари ҳам, — дейди у.
Вилоят ИИБ ахборот хизмати раҳбари вилоятда маст ҳайдовчилар кўпайишида ИИБ ходимларининг ҳам айби борлигини тан олган.
“Бунда албатта, биз ИИБ ходимларининг ҳам айбимиз бор. Ичиб тушганга умуман енгиллик бериш керак эмас. Тарғибот ва бу борадаги профилактикани кучайтиришимиз керак. Ҳайдовчининг ичиб рулга ўтиришга виждони ва қўрқуви йўл қўймаслигигача ишлашимиз керак. ОАВдан кенгроқ фойдаланишимиз лозим. Нима бўлганда ҳам, инсон ҳаёти муқаддас. Спиртли ичимлик ичиб машина ҳайдаганлар яна-да кўпроқ аниқланиб, аёвсиз жазоланиши керак. Токи, бу қилмишни бошқа такрорлашга жазм қилишмасин”, — дейди Жаҳонгир Сагдуллаев.
Изоҳ (0)