“Бу ерда мени ҳеч ким ургани ёки қийнагани йўқ” – блогер Абдуқодир Мўминов тергов жараёни ҳақида изоҳ берди

YouTube платформасидаги “Кўзгу” саҳифаси муаллифи, блогер Абдуқодир Мўминов товламачилик ва фирибгарликда айбланиб, қамоққа олинган эди. Ахборот ва оммавий коммуникациялар агентлиги ва Ички ишлар вазирлиги 24 февраль куни Тошкент шаҳар Ички ишлар бош бошқармаси вақтинча сақлаш ҳибсхонасида Абдуқодир Мўминов ва журналистлар учрашувини ташкил этди. “Дарё” мухбири блогер билан тергов жараёнлари қанчалик қонуний кечаётгани тўғрисида қисқача суҳбатлашди.

Мўминов нимада айбланмоқда?

Абдуқодир Мўминов февраль ойи бошида Тошкент шаҳар ИИББ томонидан фуқаролар Э.З. ва А.Т. мурожаатлари асосида ушланган. Унга нисбатан Жиноят кодексининг 168-моддаси (фирибгарлик), 165-моддаси (товламачилик) аломатлари билан жиноят иши қўзғатилган. Ҳозирда тергов ҳаракатлари давом этмоқда.

“Ҳаммаси жойида”

Абдуқодир Мўминов журналистлар билан суҳбатда соғлиғи ва тергов жараёни қанчалик қонуний кечаётгани ҳақида айтиб ўтди.

“Соғлиғим яхши, ҳамма жойим туппа-тузук. Бу ерда яхши муомала қилишяпти. Ҳозирги ётган хонамиз озода, уч маҳал овқат берилади. Ўзбекистон ҳукуматини жиддий танқид қилиб келардим. Шу сабаб менга нисбатан бундай яхши муомала қилишади, деб ўйламаганман. Очиғи, умуман бошқача муомала кутгандим. Ҳозир ҳаммаси жойида.

Кўриб турибсизларку, ўзгарганим йўқ, ҳолатим аввалгидай. Нима хато қилган бўлсам, ўша бўйича тергов кетяпти. Барчаси қонуний. Мени кимдир уриб ёки бошқа жисмоний, руҳий қийноқлар қўллагани йўқ. Тергов ҳаракатлари қонун доирасида бўляпти”, – деди у.

Суҳбат давомида блогер ўз оиласи ёллаган адвокатдан нега воз кечгани юзасидан ҳам тушунтириш берди.

“Биринчи марта Бобур Муқаддамов деган адвокат келди. У билан ўртамизда зиддият бор эди. Тўғриси, шундан кейин бошқа адвокатларга ишонч қолмади. Шунинг учун ундан воз кечдим ва ўзимга кўпроқ ишонганим яхши деб ўйладим. Ҳозир давлат томонидан берилган адвокат хизматидан фойдаланяпман. У яхши инсон экан. Айрим ҳуқуқий жиҳатларда маслаҳат сўрасам, тушунтиряпти. Асосан, ўзимнинг ҳуқуқимни ўзим ҳимоя қиляпман. Қайтанга, давлат томонидан берилган адвокат босиқ, жойида, имкон қадар менга ёрдам беришга ҳаракат қиляпти”, – деди блогер.

Ижтимоий тармоқларда блогер А.Мўминов вафот этган ҳақида хабарлар тарқалган эди. Мулоқот давомида Мўминов ушбу ҳолатга ҳам муносабат билдирди.

“Ижтимоий тармоқларда кўрмасдан, билмасдан туриб ёлғон гаплар тарқатиш керак эмас. Ўзим ҳам кўрмасдан, билмасдан туриб ёритишни ёмон кўраман. Кимлардир турли ёлғон маълумотлар гапиряпти, чиқаряпти, ўзига инсоф берсин. Очиғини айтаман, мана яшираётганим йўқ. Ҳаммаси жойида. Ижтимоий тармоқда ҳам кўрган бўлсаларингиз, тўғри гапириб ўрганган одамман. Масалан, кеча онам билан кўришдим (Zoom орқали – таҳр.). Барчаси учун раҳмат”, – деди блогер.

“Дарё” мухбири Абдуқодир Мўминов билан мулоқот жараёнида унда қийноқ ва руҳий босимлар аломатларини кўрмади. Учрашув видео шаклида ёзиб олинди. Бироқ блогер ўзи акс этган видео, фото ёки аудиони ОАВда эълон қилмасликни сўради.

Маълумот учун, Жиноят кодексининг 165-моддаси Товламачилик, яъни жабрланувчи ёки унинг яқин кишиларига зўрлик ишлатиш, мулкка шикаст етказиш ёки уни нобуд қилиш ёхуд жабрланувчи учун сир сақланиши лозим бўлган маълумотларни ошкор қилиш билан қўрқитиб ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўз мулки ёки мулкка бўлган ҳуқуқини беришга мажбур қиладиган шароитга солиб қўйиш – уч йилдан беш йилгача озодликни чеклаш ёҳуд уч йилдан беш йилгача озодликдан маҳрум қилиш билан жазоланади.

Жиноят кодексининг 68-моддаси Фирибгарлик, яъни алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш — базавий ҳисоблаш миқдорининг эллик бараваридан юз бараваригача миқдорда жарима ёки икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.