YouTube video platformasidagi “Ko‘zgu” sahifasi muallifi Abduqodir Mo‘minov qo‘lga olindi. Bu haqda Toshkent shahar Ichki ishlar bosh boshqarmasi xabar qildi.
Qayd etilishicha, shahar IIBBga fuqaro E.Z. ariza bilan murojaat qilib, blogerlik bilan shug‘ullanuvchi Abduqodir Mo‘minov ismli shaxsning harakatlariga nisbatan qonuniy chora ko‘rishni so‘ragan. Murojaat asosida o‘tkazilgan tekshiruv jarayonida quyidagilar aniqlangan:
Abduqodir Mo‘minov 2021-yilning oktabr oyida tanqidiy videolavhalar tayyorlash va ijtimoiy tarmoqlarda tarqatish orqali fuqaro E.Z.ning ukasi D.Y.ning nomiga rasmiylashtirilgan MCHJ bilan bog‘liq holat yuzasidan Sirdaryo viloyati IIB Tergov bo‘limi ish yurituvidagi jinoyat ishini ijobiy hal etishga IIB xodimlarini go‘yoki majbur qila olishini aytib, shu orqali E.Z.ning ishonchiga kirgan. O‘zining xizmatlari uchun jami 10 000 dollarni so‘rab, shundan 3 800 dollarni oldindan olgan. Lekin u bergan va’dasini bajarmay, olgan pullarni o‘z ehtiyojlariga ishlatib yuborgan.
Bundan tashqari, 2021-yilning oktabr oyida Mo‘minov Jizzax viloyatida fuqaro A.T. bilan uchrashib, uning rahbarligi ostidagi tashkilot to‘g‘risida salbiy yo‘sinda videolavha tayyorlaganini, ushbu materialni o‘zining “Ko‘zgu” nomli ijtimoiy tarmoq sahifasi orqali tarqatadigan bo‘lsa, tashkilot rahbariyatiga nisbatan jinoyat ishi qo‘zg‘atilib, qamoqqa olinishini aytgan. A.T.ni o‘z mulkini berishga majbur qiladigan sharoitga solib, undan ushbu ma’lumotlarni sir saqlashi uchun 70 000 dollar so‘ragan.
Fuqaro A.T. o‘z ko‘rsatuvlarining tasdig‘i sifatida Abduqodir Mo‘minov bilan o‘rtasidagi so‘zlashuvlar audio yozuvini taqdim etgan va unga nisbatan qonuniy chora ko‘rishni so‘ragan.
Xatlar yuzasidan Abduqodir Mo‘minovga nisbatan Toshkent shahar IIBB Tergov boshqarmasi tomonidan Jinoyat kodeksining 168-moddasi (firibgarlik), 165-moddasi (tovlamachilik) alomatlari bilan jinoyat ishi qo‘zg‘atilgan. Hozirda u protsessual tartibda ushlangan. Tergov harakatlari davom etmoqda.
Izoh (0)