Ўзбекистонда ичимлик сувини ўз вақтида тўламаганлик учун пеня ҳисоблаш тартиби дастурчилар томонидан ишлаб чиқилмоқда. Бу ҳақда “Ўзсувтаъминот” АЖ бошқарма бошлиғи Аброр Райимқулов “Дарё”га маълум қилди.
Аброр Райимқуловнинг айтишича, Вазирлар Маҳкамасининг июлдаги қарорига мувофиқ, аҳоли истеъмолчилари учун янги биллинг дастури жорий қилингани сабабли пеня ҳисоблаш тартиби дастурчилар томонидан ишлаб чиқилмоқда.
“Ҳозирги кунда жисмоний шахслар учун ичимлик сув биллинг дастури “Ўзтелеком” АЖ дастурчилари томонидан ишлаб чиқилмоқда, пеня ҳисоблаш функцияси қачон тайёр бўлиши ҳақида аниқ муддат айтилмаган”, — деди Аброр Раимқулов.
Қоидага кўра, истеъмолчилар ичимлик суви таъминоти ва сув чиқариш хизмати учун ҳисобга олиш приборлари мавжуд бўлганда охирги уч ойнинг ўртача сарфи бўйича ҳамда ҳисобга олиш приборлари мавжуд бўлмаганда ойлик истеъмол нормаси бўйича кейинги ой учун ҳар ойнинг 10-санасига қадар 100 фоиз олдиндан ҳақ тўлашни амалга оширишлари лозим.
Тўловнинг шартномада белгилангандан кечиктирилган ҳар бир куни учун — юридик шахслар 0,4 фоиз, жисмоний шахслар эса 0,1 фоиз пеня тўлаши кўрсатиб ўтилган. Аммо бу кўрсаткич жами кечиктирилган сумманинг 50 фоизидан ошмаслиги лозим.
Юридик истеъмолчилар томонидан қарздорлик қоида ва шартномада белгиланган муддатда тўланмаган тақдирда, пеня ҳисоблаш тартиби жорий қилинган бўлиб, ушбу тартибни амалга ошириш 2023 йилнинг 1 майидан бошланган.
Изоҳ (0)