Бош прокуратура ҳузуридаги Мажбурий ижро бюроси Самарқанд вилояти бошқармасининг қидирув шўбаси томонидан қарздор ва уларнинг мол-мулкларини топиш юзасидан тегишли чоралар кўрилмоқда, деб хабар беради ЎзА.
Маълум қилинишича, 2023 йилнинг ўтган даврида олиб борилган тезкор тадбирларда алимент тўлашдан бўйин товлаб келаётган 198 нафар қарздор фуқаро топилган. Натижада 73 нафар қарздор фуқаро алимент пулларини тўлаб бермагани сабабли, уларга нисбатан маъмурий жавобгарлик масалалари ҳал этилган.
МИБ Самарқанд вилояти бошқармаси инспектори Тўражон Жалиловга кўра, иш юритувда бўлган ижро ишлари юзасидан 110 нафар қарздор жисмоний шахсни қидириб топиш чоралари кўрилмоқда.
“Қидирувга берилган ушбу шахслардан 36 нафари чет элга турли мақсадларда чиқиб кетганлиги аниқланди ва уларга нисбатан давлатлараро қидирувни амалга ошириш бўйича сўровномалар юборилди. Бундан ташқари, маҳаллий қидирувга берилган 74 нафар қарздорни топиш бўйича тегишли ҳуқуқни муҳофаза қилиш идоралари билан ҳамкорликда иш олиб борилмоқда”, — дейди у.
Июнь охирларида Қашқадарё вилоятининг Китоб туманида яшовчи Шоира Аҳмедова қорнида ҳомиласи бўлишига қарамасдан МИБ ходимлари унга қўпол муносабатда бўлиб, 350 минг сўмлик қарздорлик учун унга тан жароҳати етказганини, шахсий автомобили қарздорлик сабаб тортиб олингани тўғрисида мурожаат йўллаганди. Ўз навбатида, МИБнинг вилоят бошқармаси ахборот хизмати раҳбари Гулноза Дилмуродова “Дарё”нинг мурожаатчи даъвоси борасидаги саволларига жавоб берар экан, ҳолат аксинча бўлганини, қарздор МИБ ходимларига тан жароҳати етказганини айтган эди.
Изоҳ (0)