Қашқадарёда 21 ёшли қизни беҳаё расмларини тарқатиш билан қўрқитиб, пул талаб қилган йигит аёл киши бўлиб чиқди. Бу ҳақда ИИВ Киберхавфсизлик маркази хабар қилди.
Маълум қилинишича, Қашқадарё вилояти, Қарши туманида яшовчи 21 ёшли қиз А.Қ. ариза билан мурожаат қилиб, Telegramъда “Фаррух-96” номли профил эгаси унинг турли фотосуратлари ва беҳаё тасвирлари бўлган видеоларини ижтимоий тармоқ орқали тарқатиб юбориш билан қўрқитиб, тарқатмаслик эвазига пул талаб қилганини билдирган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида мазкур жиноятни Қашқадарё вилояти, Ғузор туманида яшовчи 22 ёшли (аёл) Г.Б. содир этгани аниқланган.
У Telegram’да ўзини Фаррух деб таништириб, А.Қ.ни яхши кўриб қолгани, келгусида унга уйланиш мақсади борлигини айтиб, унинг ишончига кириш орқали унинг турли фотосуратлари ва беҳаё видеотасвирларини қўлга киритиб, ижтимоий тармоқларда тарқатиб юбориш билан қўрқитган.
Тарқатмаслик эвазига Г.Б. ўзининг турли банк карталарига жами 14 миллион 300 минг сўм пулни товламачилик йўли билан ўтказдириб олган ва ўз эҳтиёжлари йўлида ишлатиб юборган.
Мазкур ҳолат юзасидан Жиноят кодексининг 165-моддаси 1-қисми билан жиноят иши қўзғатилиб, Г.Б.нинг содир этилиб, фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
Жиноят кодексининг юқоридаги моддасидаги жиноий хатти-ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.
Изоҳ (0)