12 июль куни Шимолий Корея томонидан учирилган қитъалараро баллистик ракета Россиянинг эксклюзив иқтисодий зонасига тушгани ҳақида ҳеч қандай маълумот йўқ, деди Россия Ташқи ишлар вазирлиги матбуот котиби Мария Захарова.
Аввалроқ Бирлашган Миллатлар Ташкилоти бош котиби ёрдамчиси Холид Хиари ўз баёнотида КХДР ракетаси Россиянинг эксклюзив иқтисодий зонасига қулагани ҳақида айтганди. Унинг сўзларига кўра, ракета КХДР вақти билан соат 10:00 да (Тошкент вақти билан 08:00) Пхеньян туманидан тикка траектория бўйлаб учирилган. У тахминан 1 000 километр масофани босиб ўтган ва 6 648,4 километр баландликка кўтарилган, шундан сўнг Россиянинг эксклюзив иқтисодий зонасида денгизга қулаган.
“Бирлашган Миллатлар Ташкилотининг ракета парвози йўналишини аниқлай олиши қувонарли. Бундай аниқлик ва тезкорликни ҳисобга олиб, биз тез орада котибиятдан узоқ кутилган саволга жавоб оламиз, деган умиддамиз: Запорожье АЭСни ким ўққа тутяпти?” — деб ёзди Захарова Telegram каналида.
12 июль куни Шимолий Корея узоқ масофали баллистик ракетани синовдан ўтказгани ҳақида Жанубий Корея Қуролли кучлари штаб бошлиқлари қўмитаси ҳамда япониялик ҳарбийлар хабар қилган эди, аммо улар ракета турига аниқлик киритмаган.
Эртаси куни тарқатилган Корея марказий ахборот агентлиги хабарида Шимолий Корея “Хвасонпхо-18” ракетасини учиргани айтилди. Синовларга шахсан давлат раҳбари Ким Чен Ин раҳбарлик қилган. Агентлик келтирган масофа, баландлик ва парвоз вақтига оид маълумотлар юқорида келтирилган рақамларга ўхшаш. Корея марказий ахборот агентлиги ракета Шарқий Корея денгизи (Япон денгизи) сувларига қулаганини ёзди.
Бу “Хвасонпхо-18” ракетасининг иккинчи синови, биринчиси 13 апрелда амалга оширилган, дея қайд этади Yonhap. Синовлар Пхеньян нинг Америка разведкачи самолётлари мамлакат ҳаво ҳудудига бостириб киргани ҳақидаги даъволари фонида бўлиб ўтди.
Изоҳ (0)