Осиё тараққиёт банки (ОТБ) Канокпан Лао-Араяни Ўзбекистондаги янги директори этиб тайинлади. Бу ҳақда банк матбуот хизмати “Дарё”га маълум қилди.
Қайд этилишича, Лао-Арая ОТБнинг Ўзбекистондаги фаолиятига раҳбарлик қилади ҳамда банкнинг 2023—2028 йилларга мўлжалланган янги мамлакат билан ҳамкорлик стратегиясини тайёрлаш ва амалга ошириш жараёнини назорат қилади. ОТБ мамлакатнинг инклюзив ва бозор иқтисодиётига ўтиши, хусусий секторни ривожлантириш, “яшил” трансформация, иқтисодий ва ижтимоий тенгсизликларни қисқартириш, минтақавий ҳамкорлик ва интеграцияни кенгайтириш учун кўмакни кучайтиради.
Лао-Арая Осиё-Тинч океани минтақасида, жумладан, Марказий Осиёда 25 йилдан ортиқ ривожланиш ва иқтисодиёт соҳасида тажрибага эга. У ОТБга 2001 йилда Таиланд Молия вазирлигидан келган ва шундан бери банкда бир қатор юқори лавозимларда ишлаган. Тайинланишидан олдин у Қирғизистонда ваколатхона директори бўлиб ишлаган ва у ерда банк фаолиятини, жумладан, Қирғизистон иқтисодиёти ва аҳолиси саломатлигига ҳалокатли таъсир кўрсатган COVID-19 пандемияси билан боғлиқ кўмакнинг кўрсатилишини бошқарган.
Ўзбекистон ОТБга 1995 йилда аъзо бўлган. Бугунги кунга қадар ОТБ Ўзбекистонга умумий қиймати 11,5 миллиард долларлик 240 та қарз, грант ва давлат секторига техник кўмак ажратган. Марказий Осиё минтақавий иқтисодий ҳамкорлиги (CAREC) дастури доирасидаги минтақавий ҳамкорлик ва интеграция ташаббуслари ОТБнинг Ўзбекистондаги фаолиятининг ажралмас қисми бўлиб қолмоқда.
Бир неча кун олдин Анди Аранитаси Европа тикланиш ва тараққиёт банкининг (ЕТТБ) Ўзбекистондаги ваколатхонаси директори ва раҳбари этиб тайинланганди. У 2023 йил 1 сентябрда ўз лавозим мажбуриятларини бажаришга киришади.
Изоҳ (0)